[Dawa ka EJHDA na u DC ban hukum mardor ia ka NHAI ban maramot surok noh]
Ki nongialam bad ki dkhot jong ka seng ki nongniah trok kaba la tip kum ka East Jaintia Hills Driver Association (EJHDA) Central Body, mynta ki la leit ban buh da ka jingthoh ha ophis u Deputy Commissioner ka East Jaintia Hills District, ban pynsngew bad kyntu na u kum u khlieh ka District ban phah maramot noh ia ka surok NH-6 na ka National Highway Authority of India (NHAI) kaba shimti ban peit ia une u surok uba la jot rathai.
U President ma Lam Dkhar ryngkat ka jingdonlang u Vice President ma K. Phawa, ki la ong ka Khliehriat kaba long ka Head Quarter jong kane ka District kala long kaba lehraiñ shisha haduh katta katta ban peit ia ka surok bah NH-6 ba iaid lyngba kane ka sor kaba la jot bad dap sa tang ki thliew ki syar. Ki la ong ruh kumba long mynta ka jingsniew jong kane ka surok ka la jur bha kaba la ktah ia ka leit ka wan jong ki paidbah khamtam ia kiba shitom ba pang, ki khynnah skul ki nongtrei ki la mad jingeh namar ka jingsniew jong kane ka surok ka wan rah ruh ka jingdheng kali bad ka jingma ruh ia ki nongleit nongwan ym tang ia ki nongñiah kali hynrei ia ki nongiaid kjat iaid lynti lyngba kane ka surok bah ruh.
Na ka liang u ma Lam u kyntu jur ia u MLA ka thaiñ u ma Kyrmen Shylla uba long ruh u myntri ka sorkar bad ia u DC ba kin bthat mardor ia ka NHAI ba kan maramot ia kane ka surok, ha kaba ma ki ruh ki la iohi hi da la ki jong ki khmat ia ka jingsniew jong kane ka surok khamtam eh hapoh ka nongbah Khliehriat. U ma K. Phawa u la ong ba kumba long mynta kane ka surok kala buh ka jingma ba khraw ia baroh ki padibah ba iaid ba ieng lyngba kane ka surok, u la ong ruh ba ka NHAI ka shu maramot tang dep ia kane ka surok da kaba shu tep da ka khyndew ia ki thliew ki syar, kaba nangwan rah shu shuh ia ki jingeh ia ki paidbah da ka jingmih jong u pum pum ha ka por ba rang bad ka ktieh ha ka por ba slap, kumta na ka liang jong u ruh, u la kyntu jur sa shisien ia u MLA ka thaiñ kumjuh ruh ia u DC ban hukum ia ki nongpyniaid ka NHAI ban maramot noh kane ka surok bah, khnang ba ki paidbah ka thaiñ kumjuh ruh ki nongleit nongwan lyngba kane ka surok kin lait na ki jingma ba bun jait.
