Ka kong D.D. Syngai MCS, Additional Deputy Commissioner jong ka West Jaintia Hills District mynta ka sngi ka la plie ia ka jingai jinghikai ia ki samla kaba la tip kum ka Home Health Aide Skill Training, ha Moosalyngkat, Salaroh Jowai.
Kane ka jingaijinghikai ka dei kaba la pyniaid da ka Mih-Myntdu Community Social Welfare Association (MCSWA), ia kaba la mang pisa da ka Meghalaya State Skill Development Society. Ha kane ka training ki don haduh 120 ngut kiba la wan ban apply hynrei la jied tang 30 ngut ban ioh ia kane ka jingai jinghikai.
Ka kong Syngai haba kren ka la ong ba kane ka jingai jinghikai ia ki samla ka long kawei na ki jingai jinghikai kaba donkam bha, namar lyngba kane ki samla ym tang ba ki ioh kam ban kamai ialade hynrei ka dei kawei na ki kam ba ki lah ban shakri ia ki para briew kiba don ha ka pang ka shitom. Na ka liang ka kong Syngai kala ai khublei kyrpang ruh ia baroh ki samla bym pat iohkam kiba la wan shakhmat ha kane ka jingai jinghikai ia ki ba shah jied bad kumjuh ia kito ki bym shah jied ruh.
Ia ki jingbatai baniah halor kane ka jingai jinghikai la ioh na ka Dr. J. N. Shullai Director MCSWA, ki jingkren na ka Dr. N. Nongpluh MS Dr. Norman Tunnel Hospital Jowai, ma Dame. H. Pde na ka Synjuk Waheh Chnong Jowai, ma Lambormi Suchen SDO-MSSDS bad kiwei de.
Na ka liang jong ka Dr. Nongpluh kala plie pyrda ia ka Laboratory ha katei ka jaka.
