U Myntri ka tnad lum khajna (Taxes) bad kiwei u James P.K Sangma mynta ka sngi ula kren shai sha ki paidbah nongshong shnong ka jylla Meghalaya lyngba ki lad pathai khubor da kaba ong ba ka sorkar jylla kan pyndam noh ia ka aiñ khalai ia kaba la tip kum ka Meghalaya Regulation of Gaming Act 2021 kaba kynthup lang ruh ia ka jingiakhalai Casino kaba la wanrah shibun ki jingpyrshah na kiba bun ba lang hapoh kine ki khyndiat bnai ba la lah.
Na ka liang u Myntri ula ong ba ka jingthmu ha kaba nyngkong ban wanrah ia kane ka Aiñ ka long ban wanrah ia ka jingmyntoi ha ka jinglum khajna jong ka sorkar jylla. Hynrei hadien ba la mih shibun ki jingpyrshah, kumta ula lum ia ka jingialang jong ki Seng Niam, ki Sengbhalang, ki Rangbahshnong bad kiwei kiwei bad hadien ka jinglum jingtip na baroh ki liang ula ong ba ka sorkar kala shim ia ka rai ban pyndam noh shisyndon ia kane ka aiñ.
U James ula ai khublei ia baroh ki nongshong shnong kiba la iadon bynta lang ban ai jingmut bad pyni pynkdew halor kane ia ka sorkar jylla, u ong ruh ba ka mon jong u paidbah ka dei kaba kongsan tam ha ka synshar paidbah bad ka long kaba donkam ban burom.