Mynta ka sngi u ma M.A Challam, MCS Additional Deputy Commissioner ka West Jaiñtia Hills ula plie ïa ka prokram ai jinghikai ïa ki 61 ngut ki samla shynrang bad kynthei halor ka rukom shna sabon bad ka rukom shna jingbam na ki soh, ki jhur bad kiwei kiwei bad kane jingai jinghikai kan neh haduh 15 sngi.
Ïa kane ka prokarm ai jinghikai la pynïaid da ka Jaiñtia Hills Development Society (JHDS) kawei na ki kynhun treimon sngewbha kaba la synñiang shibun ki kam ba bha ha ka imlang ka sahlang, kane ka jingai jinghikai la ïatreilang ryngkat ka jingïarap pisa na ka ophis u Deputy Commissioner ka WJHD (PMKKY).
Hashwa ban sdang jong kane ka prokram la don ka jingïalang bala pynlong ha Samanlang Socio-Cultural Pastoral Centre, Mihmyntdu Lumbihsyntu, ba la pynïaid da u Programme Coordinator JHDS ma Denis Kurkalang, haka jingïadonlang u Fr. Manbha Pakem, Director JHDS, u Fr. Ferdinand Dkhar Diocesan Administrator Jowai Diocese, u ma Lambormi Suchen Skill Development Officer, u Macsal Jones Nongsiej, Master Trainer Soap Making nalor kiwei de kiba la shah khot sngewbha.
Kitei ki 61 ngut ki samla shynrang bad kynthei ki dei kiba la shah jied kyrpang na kylleng ki shnong kiba hap hapoh ka West Jaiñtia Hills District. La ïathuh ruh ba hadien ba kila pyndep ïa kane ka jingshah hikai kin sa ïoh ruh ïa ki Certificate bad ki tiar ki tar (Material) ba kin ïoh pyndonkam na ka bynta ban seng ïa ka kam la jong.
U kongsan ma M.A Challam MCS haba ai jingkren ula kyntu jur ïa kitei ki samla hashwa ba kin jied ïa kano kano ka kam ha ka jingim kidei ban kynmaw ïa kine ki lai tylli ki bynta ha ka jingim kita ki long kaba nyngkong “ka jingkut jingmut bad jingïaineh, kaba ar ka jingtrei shitom bad kaba lai ka jingshahniah ha U Blei”.
Ïa ka kyntien pdiang sngewbha ha kane ka sngi la ïoh na ka kong Mandakini Nongtdu, Coordinator FARM, katba ïa ki kyntien ai khublei la ïoh na ka samla Sharon Daisy Suchiang kaba dei ka Team member.
