Ka tnat treikam jong ka ophis Divisional Forest Officer (DFO) Jaiñtia Hills Wildlife Division, Jowai mynta ka sngi kala pynkut ïa ka jingrakhe ïa taïew ‘Wildlife Week Celebration-2022’ da kaba pynlong ïa ka jingïalang ha Community Hall jong ka shnong Raliang, West Jaiñtia Hills District.
Ha kane ka sngi ïa ka jingïalang la pynïaid da u bah S. Budnah IFS Divisional Forest Officer, Social Forestry Division Jaiñtia Hills, ha ka jingdonlang u S.M Sahai IFS Principal Chief Conservator of Forest (Biodiversity & Wildlife) & Chief Wildlife Warden, Meghalaya kum u kongsan ryngkat u P.K Agrahari IFS, Conservator of Forest (M&E) Meghalaya, Shillong kum u symbud kongsan, u ma R. Parien Chairman ka Khloo Blai ka Raij u Langdoh Ionglang, u Dolloi ka Elaka Raliang ma C. Lyngdoh, ki ophisar na katei ka tnad, ki nonghikai lem bad ki nonghikai.
U kongsan jong kane ka sngi u S.M Sahai IFS Principal Chief Conservator of Forest (Biodiversity & Wildlife) & Chief Wildlife Warden, ka jylla ha ka jingkren ula ai ka jingïaroh ïa kane ka tnad kala la lah ban rakhe pyndonburom ïa kane ka sngi ba kyrpang. Ula ïathuh ba ka jingrakhe ïa kane ka taïew kan ïarap shibun eh ïa ki khynnah skul bad ki nongshong shnong ban sngewthuh shaphang ka jingkordor jong ka mariang.
‘Mynta u snem ka jingrakhe ka long kum shi bynta ban warah biang ïa ka jinglong jingman jong ka mariang kumba long ha ki por ba mynshwa”, u Sahai u long ruh lyngba ka skim ‘Wildlife Institute of India’ la lah ban ithuh haduh 22 jait ki mrad kiba kyrpang bad hapoh ka jylla Meghalaya la pynithuh ïa u ’Lathapsim kum u State Animal.
Kiwei de kiba ai jingkren ki kynthup ïa ka kong N. Laloo, MFS, Divisional Forest Officer (DFO) kaba la ïathuh lyngkot ïa ka History jong kane ka Wildlife Week Celebration, da kaba ong ba dei ha u snem 1952 ka sorkar India kala seng ïa ka Indian Board of Wildlife shi bynta na ka thong ban pynsngewthuh ïa ki nongshong shnong ka ri khamtam ïa ki khynnah skul ban don ka jingkitkhlieh ïa ka mei mariang.
Katba na ka liang ka kong M. Suchiang Forest Pleader kala batai bniah shapang ki kyndon aiñ jong ka ‘Wildlife Protection Act’ da kaba pynsngew ba ïa kane ka aiñ (Act) la pyntreikam da ka ïing Dorbar thawaiñ ka Ri naduh ka snem 1972 ban ïada ïa ka mariang bad ka jingshah ktah jong ki mrad ki mreng bad ki khlaw ki btab.
Kala pyntip ba na ka liang ka sorkar ruh kala buh ïa ki kyndon aiñ ba tyngeh ïa kiba leh pyrshah ïa ka mariang kata da kaba shah set patok 3 snem bad ka kuna kaba 25 hajar. Ha ka juh ka por kala pynsngew ruh shaphang ki saw tylli ki bynta jong ki mraw kiba im haka mariang kiba kynthp ha ka kyrdan Schedule-1,2,3 bad 4.
Ha kane ka sngi la sam ruh ïa ki khusnam sha ki khynnad skul kiba la jop ha ka jingïakop jong ka Extempore Speech jong ki klas XI bad XII ba la jop da u Mr. Deo Gracious D. Nongsiej na ka St. Dominic Hr. Secondary School Mowkyndeng, ba ar da ka Idashisha Rabon na ka St. Dominic Hr. Secondary School Mowkyndeng bad balai ka Sakanipaia Marang na ka Winter Adventist Hr. Secondary School, Mowkaiaw.
Ha ka jingiakop thoh Essay ha ka klas IX, X la jop da u Randyu Ahmehedotsni Lyngdoh na ka Winter Adventist Hr. Secondary School, Mowkaiaw, ba ar da u Samual Dkhar na ka St. Dominic Hr. Secondary School Mowkyndeng bad ba lai u Sherif T. Sajem na ka Jehovan Jireh Hr. Secondary School, Raliang.
Katba ha ka jingïakop dro dur halor ka phang “Save Habitat, Save Wildlife” ha ka kyrdan jong ki klas VI & VIII la jop da u Mangkara Sungoh na ka Little Flower English Secondary School Shangpung, ba ar ka Diwansa Iakai na ka Shechem Upper Primary School Shangpung bad ba lai ka Idahun Sajem na ka Lumuroo Secondary School Shangpung.
Ha ka juh ka por la sam ruh ïa ka khusnam sha kito ki nongpynlait im ïa ki mrad da kaba leit aiti sha ka ophis DFO kiba kynthup haduh 21 ngut na West Jaiñtia Hills bad 6 ngut na East Jaiñtia Hills District.
Ha kane ka prokram u kongsan u la pyllait ruh ïa ka kot bala thoh shaphang ki klaw ki btap bad ki mrad ki mreng bala pynmih da kane ka tnat.
