Ka kynhun jong ki nongñiah Bike hapoh ka lama “All India Motorbike Expedition (AIME) 2022” kiba don haduh 75 ngut ei ei kin wan poi hapoh ka jylla Meghalaya lashai ka sngi da kaba rung lyngba ka Malidor na Assam bad poi lyngba ia ka East Jaiñtia bad iaid lyngba ia ka West Jaiñtia ban poi shaduh sha nongbah Shillong, jong ka East Khasi Hills.
Ia kane ka jingiaid lynti jong kine ki nongñiah Bike la iasnohkti lang ruh da ka Department of Sports jong ka Jylla Meghalaya bad ka Ministry of Youth Affairs and Sports jong ka sorkar Pdeng kaba long ruh shi bynta na ka jingrakhe ia ka “Azadi ka Amrit Mohatsav” jong ka ri India.
Kane ka kynhun ka don ia ka thong ban iaid lynti haduh 21,000 Kms da kaba iaid lyngba ia ki 34 tylli ki States/UTs bad 250 tylli ki District.
Lashai ka sngi kin poi ha Malidor kumba 8:00 hadu 10:00 baje mynstep.
Na ka liang ki bor pyniaid District jong ka East Jaiñtia Hills khamtam na ka liang ka tnad Pulit kila shimkhia ban synran ia katei ka kynhun ha shilynter u surok bah NH-6 haduh ba kut u pud jong ka District. Nangta yn sa shimti pat da ki bor pyniaid District jong ka West Jaiñtia Hills District bad kumta ter ter haduh ban da poi ha nongbah Shillong ha kaba kin leit shongthait hapoh SAI Indoor Multipurpose Hall.
Kan don ka jingpdiang sngewbha ruh ia kane ka kynhun hapoh katei ka Indoor Multipurpose Hall jong ka SAI. Kane ka kynhun kan mih napoh ka Jylla ha ka sngi ba bud kata ha ka 20 tari mynta u bnai ha ka por 7:30 AM.