Jop ka Ladthadlaboh, Don Rua bad ka Kingsmen
Ka West Jaiñtia District Sport Association (WJDSA) mynta ka sngi 18 tarik u Risaw kala sdang ïa ka lympung ïalehkai Open Basketball Tournament 2022 ïa kaba la pynïalehkai ha madan Basketball ka Thomas Jones Synod College, Jowai, ïa kane ka lympung la wan ban plie pyrda da u kongsan uba dei ruh u Chairman ka Jowai Municipal Board u ma L.D. Lakiang.
Shuh shuh ïane ka lympung la pynïaid da ka West Jaiñtia District Sports Association (WJDSA) shi bynta na ka jingrakhe jubilee ksiar jong ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Kiwei de kiba ïadonlang ha kane ka sngi ki kynthup naduh u ma K. Passah District Sport Officer ka West Jaiñtia Hills u ma L. Laloo Hony. General Secretary, ki dkhot ka WJDSA, ki nonghikai na ka Thomas Jones Synod College Jowai nalor kiwei de kiba la shah khot sngewbha.
Ha kane ka sngi sdang ha ka jingïalehkai kaba nyngkong ka kynhun na Ladthadlaboh kala jop da 45 – 19 ïa ka Newhill.
Ka jingïalehkai kaba ar ka Don Rua kala jop da 72-24 ïa ka Onyx, katba ha ka jingïakhun kaba lai ka Kingsmen kala jop da 43-35 ïa ka SASWJ.
