Ka tnad Directorate of Civil Defence & Home Guards, Shillong kala pynshai paidbah halor ka jingmih khubor ha ki lad pathai khubor mynta ka sngi ha ka jingiadei bad ka jingkynnoh thung kam Home Guards da ka ophis Home Guards, East Jaintia Hills khlem kano kano ka jingpynbna paidbah ne advertisement.
Ka tnad ka pynshai ba ka jingthung kam ha ka tnad Civil Defence & Home Guards la ju pynlong da ka Central Recruitment Board jong kane ka tnad na ka bynta ka jylla hi baroh kawei, lait na ki nongtrei hapoh ophis kiba la thung da ka District Selection Commission.
La pynshai ba ki ophis kiba don ha ki District kim don bor ban pynlong ia kano kano ka jingthungkam ha kano kano ka Regular Post lait noh tang ha ki post ba long shipor (Temporary basis).
Ka tnad ka kwah ban pynshai sha ki seng bhalang bad ki samla wad kam ba ka jingkhot training ia ki Home Guards Volunteers kaba la pynlong ha District Home Guards Training Centre ha East Jaintia Hills kam dei ka jingthung kam, namar ba ki Home Guard Volunteers kim lah ban long ki nongtrei sorkar ba pura ne bala pynskhem, hynrei ki dei tang kum ki nongiarap.
La pynshai shuh shuh ba ka tnad ha shwa ban pynlong ia kane ka training ha East Jaintia kala dep ban ai jingtip sha ka ophis jong u Deputy Commissioner ka East Jaintia bad kila ioh ruh ia ka bor ban pynlong ia kane ka training.
La pynshai paidbah ruh ba ki District Level Officer jong ki Civil Defence ba khlieh da u Deputy Controller of Civil Defence bad ki Home Guards ba khlieh da u District Home Guards Commandant/Officer Commanding ki shait pynlong ia ka jingai training ia ki Volunteer ha baroh shi snem lynter. Kumta la kyntu ia ki paidbah ba kim dei ban sngewthuh bakla ia kane ba ka dei ka jingthungkam ba pura (Rugular employment) hynrei ki dei tang ka jingai jinghikai (training) ia ki Volunteer.
Ka tnad ka kyntu ia ki samla, ki Dorbar Shnong, ki School, ki College bad ki ophis ba kin wad jingtip na ka ophis Deputy Controller of Civil Defence for Civil Defence Training bad na ka ophis District Home Guards Commandant lane ki Officer Commanding for Home Guards lada ki kwah ban ioh training ban long kum ki Volunteer.