U Chief Minister ka jylla u Conrad K. Sangma haba kren mynta ka sngi ha ka jingialang sam skhim ha Baghmara, South Garo Hills ula ong ba ka skhim jingiarap jong ka sorkar lyngba ka FOCUS la lah ban kner lem mynta sa sha ki kynhun jong ki briew kiba shong ha ki jaka sor (Urban).
U ong ba ki kynhun (Producer Groups) kiba ym duna ia ka 10 ngut ka jingdon ki dkhot kiba long ki nongpynmih jingmyntoi ki lah ban ioh ia kane ka lad jingiarap kaba Rs.5000/- tyngka marwei hapoh ka kynhun ba ki don.
U la ong ruh ba ki kynhun kum ki nongthaiñ jaiñ lane ki nongshna ashar ki lah ban iasnohkti lang ban pynlong kawei ka Producer Group hapoh ka FOCUS ha ki jaka sor. Nalor kata wat ki samla kiba thaw ia ki lad kamai bapher bapher ki lah ban shim ia kane ka kabu da kaba thaw ia ki kynhun bad pynrung ialade hapoh ka FOCUS.
Ula batai ba ka jingpynrung kyrteng (Registration) na ka bynta ka FOCUS hapoh ka jylla kan bteng haduh u bnai November jong ka 30 tarik bad dei ha ka taiew ba nyngkong jong u bnai December yn sa pyllait ia ka pisa sha baroh kito kiba dei ban ioh bynta.
U Chief Minister ula ong ba ha ka por ba pynrung kyrteng hapoh kane ka skhim yn phah shwa ia ka T.1000/- (Shi hajar) tyngka bad ia ka pisa ba bud yn thep hapoh ka Bank jong ka kynhun ha ka taiew ba nyngkong u December mynta ka snem.