Ka Mukhla Nongrim Sports Club hynnin ka sngi Saitjaiñ kala sdang ïa ka lympung ïalehkai phutbol kaba la tip kum ka ‘8th 7-Aside Day & Night Tournament’ ïa kaba la wan ban plie pyrda da kongsan u ma Rening Sukhlaiñ ha madan phutbol ka shnong ha Slot Masi.
Ha kane ka sngi la wan ban ïadonlang da u Waheh Shnong ka Mukhla Nongrim u W/h Buhlut Suna, u General Secretary ka Chnong u W/h Standbyme Sari, ha ryngkat ka jingwan sakhi lang ki khun samla ka shnong nalor ki dkhot ka Mukhla Nongrim Sports Club.
Na ka liang u kongsan ula pyllait paidbah kumjuh ïa ki tiket Lucky Draw jong ka Sports Club kum shi bynta ban pynmih pisa ïa ka Sports Club, ïa ka jingïalang la pynïaid da u Ryngkat Sari President ka Sports Club, la ïoh ruh ban pynsngew ïa ka Report treikam na u Firstly Sari Secretary ka Sports Club.
La ïathuh ba ha kane ka lympung la wan ban ïashim bynta haduh 32 tylli ki kynhun Sports Club napoh ka Ri-Lum Jaiñtia, ha ka jingsdang jong ka jingïakhun la wan ban aireng hadpeng ka Mukhla Umlangshor Sports Club Pyrshah ïa ka Mookyniang Khliehtyrsi Sports Club, ha kaba ka Mukhla Umlangshor Sports ka la jop da 2-0 kol ïa ka Mookyniang Khliehtyrsi Sports Club ha ka jingïashut Tie-breaker.
Shuh shuh la ïathuh ha kane ka Tournament na ka bynta ka jingïakhun jong ka Semi final bad ka Final yn pynïaleh ha ka por 8 baje mynmiet ha madan Slot Masi hi, la pyntip ruh ba ka jingïakhun Final kan long ha ka 10/12/2022.
