Ka West Jaiñtia District Sport Association (WJDSA) lyngba u Hony. General Secretary ma Lammat-oo Laloo ula pyntip ba la khot bai ‘Entry Fee’ ïa kino kino ki kynhun ban wan ïashim bynta ha ka lympung ïalehkai phutbol ‘Open To All Knock Out Football Tournament-2022’ ïa kaba yn pynlong ha madan Kiang Nangbah Stadium, Dongmihsngi Jowai.
La ïathuh ba ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Na ka bynta ka khusnam sha ki nongjop (Winner) jong kane ka lympung kan long da kaba song pisa kaba 2,00,000/- (Ar Lak) tyngka ryngkat ka Trophy bad Certificate, katba ka kynhun ba wan ba ar (Runner-Up) kan long 1,00,000/- (Shi Lak) tyngka ryngkat ka Trophy bad Certificate. Ïa ka bai ‘Entry Fee’ kan long ha ka dor kaba 5,000/- (San Hajar) tyngka bad ka tarik ba khadduh ban pynpoi ïa ki kyrteng kan long haka 2.11.2022, ban tip khambniah phone ha kine ki No: 9485432298, 9436106399.
