Ki nongshet ja sngi ‘PM Poshan (MDM)’ ïa ki khynnah skul hapoh ka jylla kiba la don baroh 18,776 ngut, mynta ka sngi kila pynbna paidbah ba kin pynlong ia ka jingialang bah ne ka rally ha Madan Fire brigade ïew Rynghep Laitumkhrah, Shillong ha ka 31 tarik u Risaw, 2022 naduh ka por 10 baje mynstep.
Ïa kane la pynbna mynta ka sngi da u President ka All Jaiñtia Mid Day Meal Worker Union (AJMDMWU), Jowai ma Jerry Suting hadien ka jingïalang jong ki kaba la long ha Dorbar Hall ka Tpep-Pale Jowai.
Ka seng kala shim ia kane ka jingialang bah ha Shillong kalong halor ka nongrim ba ka sorkar kam shem la pyntreikam ia ka jingkular hadien ba la dep ïakut sha ki nongialam ka seng dang ha kine ki kyndiat bnai.
Kumba long mynta ka sorkar kmie ka la siew pisa haduh 90 percent, katba na ka sorkar jylla ka siew tang 10 percent (100 tyngka lada kheiñ lang ka long tang 1000 tyngka) ha ka shibnai, halor kane ka AJMDMWU ka dawa jur na ka sorkar jylla lyngba u Myntri Rangbah ba kan ïarap katba lah ban pynkiew noh ïa kane ka share.
Na ka liang jong kitei ki nongshet ja sngi ‘PM Poshan’ kila pynpaw ïa ki jingeh kaba khraw ban pyndap pynbiang ïa ki khun ki kti, naduh ka bai skul, bai uniphom, ka bai kot bai kopi bad kiwei de ki jingdonkam jong ki khun jong ki.
Hynrei lada kheiñ ïa ka bai nong kum ka jingsiew ba ai sngewbha ‘Honorarium’ ka long tang T.1000/- shi bnai kaba shongdor tang 30 shi sngi bad ka jingsiew ka long tang 10 bnai haka shisnem ïa kane ruh kila dawa ban dei ban siew beit haduh 12 bnai ha ka shisnem namar ha u bnai December ka don shibun ki jingdawa ban pynkhreh ïa ka Christmas.
Na ka liang u Adviser ka seng ‘All Jaiñtia Mid Day Meal Workers Union’ (AJMDMWU) ma Khroo L. Pariat ula pynkynmaw ba ka seng kala dep ban pynkynmaw ïa ka sorkar hynrei kim shym la urlong, kumta u khot ïa baroh ki nongshet ja sngi ba kin pynlong beit da ka jingïalang bah jong baroh ki nongshet ja sngi hapoh ka jylla ba kin wan ïashim bynta lang, da kaba u ong ruh ba kane ka long ka jingsdang bad ka sien kaba khadduh ban shah ïa ki jingkular jong ka sokar.
Ha ka juh ka por ula dawa na ka sorkar kumjuh ba ka dei ban buh noh da ki tyndong shet jingshet LPG ha ki kamra shet jong ki skul hapoh ka PM Poshan, khnang ban lait na ka jingpyndonkam da ki dieng (dpei) kaba ktah ïa ka koit ka khiah bad ka mariang kumjuh.
