Ka lympung ialehkai phutbol jong ka kyrdan 1st Division Football Tournament 2022 ia kaba la tip kum ka ‘Chatister Kharkongor Memorial Trophy’, kaba pyniaid da ka West Jaintia District Sports Association (WJDSA) kaba la long mynta ka sngi 29.10.2022 ha madan Kiang Nangbah Stadium, Dongmihsngi Jowai, kala long hapdeng ka Moosalyngkat SC pyrshah ia ka Mukhla Raij SC.
Haba phai sha ka jingiakhun ka kynhun ialehkai jong ka Moosalyngkat SC kala lah ban pynliem da 4-1 kol ia ka Mukhla Raij SC. Ia kitei ki kol na ka liang ka Moosalyngkat SC la ioh ban thep da u Sebastian Dhar ha ka minit kaba 52, ia ka kol ba ar da u Lalthakhuma Ngaite ha ka minit kaba 66, ia ka kol ba lai da u Living Stone Mannar haka minit kaba 80 bad ia ka kol ba saw pat la thep da u Gladio Susngi ha ka minit kaba 87 jong ka jingialehkai.
Katba na ka liang ka shi kol jong ka Mukhla Raij SC pat la ioh ban thep da u Joydeep Bamon ha ka minit kaba 77 jong ka jingiakhun.
Ka jingialehkai ka ban long ha ka sngi nyngkong pat kata ha ka 31.10.2022 kan long hadpeng ka Chutwakhu SC pyrshah ia ka Luti Tuber Ialong SC ha ka por 2 baje shiteng nohphai sngi.