Ka Khasi Student Union (KSU) Jowai Unit ha kane ka sngi saitjaiñ 29 tarik ka kala ïoh ban pynlong ïaka “Open To All Long Distance Running Race” ha ka por mynstep kum ka dak ba lehkmen lyngkhuh dapsnem ba Ar snem ka Jowai Unit bad kane ka long kaba jop daka ba sakhi da ki babun ki nongïashim bynta ha ka jingmareh.
Ha kane ka step la ïadon lang ruh u ma Awhai Andrew Shullai MDC Jowai Central kum u kongsan uba la sam kumjuh ïa ki khusnam, nalor ka jingdonlang ki Nongïalam ka KSU Jowai Circle, ki Nongïalam ka KSU WJHD Unit u Leningrad Tariang General Secretary, u Phrangki Papeng Finance Secretary bad kiwei de.
Ïa kane ka jingïakop mareh Marathon la sdang naduh na Lad College KNGC ïaid na Ladthadlaboh (main road) – Newhill (main road) – Iawmusiang – Lad pohskur – Iongpiah – Panaliar – Old Civil Hospital – Le kyrnah bad pynkut ha Kiang Nangbah Monument (Syntu Ksiar).
Ki nongjop naka liang ki Shynrang ki long 1) Kordor S. Manners, 2) Eibor Kyndait, 3) Sanctify Pale, 4) Khainti Shylla, 5) Alan Banda Rymbai, 6) Shibor Shadap, 7) Daioo – Hi – mitre Suting, 8) Ioobiang Langstang, 9) Chanmeki Chyrmang, 10) Ram Shylla. Ha ka liang ki Kynthei: 1) Happiness Phawa, 2) Levina Papiah, 3) Monlangki Kyndait, 4) Ribity Sana, 5) Rika Dametre Bareh, 6) Syndong Shylla, 7) Beauty Shylla, 8) Ewadaeimi Phawa, 9) Mini Kyndait, 10) Phrui Phawa.
U kongsang haba ai jingkren ula kyntu ïaki khun samla ba ieid ïaka sports ba kin don shisha ka mynsiem ïaleh ban poi shaka thong bad ula ai nuksa ruh iaki ba kum hakane ka juk stad ki dei ban pyndonkam ïaka kor internet ban peit ïaki trick lane ki jinghikai kumno ban long tbit ha ki kam Sports kum ka marathon.
U General Secretary Leningrad Tariang haba ai jingkren ula ong ba wat lada ka sorkar kam lah ban pynkiew ïaka kam sports hapoh jylla hynrei ki samla ieid sports kim dei ban duh mynsiem kihap hi ban trei minot ban poi sha ka thong daka jingtrei minot lade.
Naka liang ka KSU Jowai ka Ai khublei ïaka pulit department, ki nongpeit ka madam siat khnam, ka Office u DMHO bad ïaki bym lah ban niew ba ki la ai ïaka jingïatrei lang lyngba jong ki kane ka Race ka long kaba jop, ka KSU Jowai Unit ka kyrmen ba kan sa poi ka por ba kan lah ban ïarap bad pynkiew ïaki samla kiba don sap ha ka jingïalehkai Sport’s, pynkut ka kyrwoh na u samla Nidapoi Shadap Publicity Secretary KSU Jowai Unit.
