Ka tnad District Disaster Management Authority (DDMA) jong ka East Khasi Hills District ha ka 29 tarik mynta u bnai ka la rakhe ia ka sngi kyrpang kaba la tip kum ka National Disaster Reduction Day bad ha kane ka sngi la ioh ban pynkup burom ia ki lai ngut ki nongjngi um ba paw kiba don bynta ha ka ban pynlait im ia ki briew kiba hap sha ki um ki wah, bad ia kawei ka Village Disaster Management Committee.
Ia kane ka prokram la pynlong ha Central Training Institute, Mawdiangdiang, ha ka jingiadon ryngkat i kong Isawanda Laloo, IAS, Deputy Commissioner & Chairperson (DDMA), East Khasi Hills District, Shillong, la iadon lang ruh ka kong H.M.L Kynta, MCS, Additional Deputy Commissioner & CEO (DDMAI), East Khasi Hills District, Shillong, Joint Director Civil Defence & Home Guards, ki Officers na ka DDMA, SDMA, District Administration, Police, Civil Defence & Home Guards, Fire & Emergency Services, ki Rangbah Shnong bad ki Appda Mitra Volunteers.
Kine ki lai ngut ki nongjngi um pa paw kiba la shah pynkup burom ki kynthup ia u Ridenstar Mawpat, na ka shnong Warbah, u Tarsan Khongshei bad u Tyngngait Khongshei kiba na ka shnong Mawsohmad kiba hap hapoh ka Khatarshnong-Laitkroh C&RD Block. Da ka jingiarap jong kine ki lai ngut ki nongjngi la lah ban ioh sei ia ki met iap kiba la shah rong noh ha ka wah Kyllang.
Katba ka Village Disaster Management Committee (VDMC) kaba la shah pynkup burom ka dei Village Disaster Management Committee jong ka shnong Kenmynsaw kaba hap hapoh ka Mawsynram C&RD Block. Kumban shu pynkynmaw ba kane ka Kenmynsaw VDMC kala iadon bynta ban pyllait im ia ki briew kiba sah kut ha kawei ka ïing na ka jingshahban khyndew kaba la jia ha ka 17.06.2022 ha kane hi ka shnong.
Ha kane ka sngi ka tnad DDMA kala sam ruh ia ki Emergency Responder Kits sha ki 202 tylli ki Aapda Mitra Volunteers kiba la pyndep ia ka jingshah hikai bala pynlong da ka DDMA naduh u bnai May haduh September hapoh ka jingpeit jong ka tnad Civil Defence & Home Guards, Fire & Emergency etc. hapoh ka skhim “Upscaling of Aapda Mitra”.
Kala don ruh ka jingiarap kaba la ai kyrpang ia baroh ki Volunteer ban ioh ia ka Insurance Scheme kaba la buh da ka Sorkar.