Mynta ka sngi ka District Magistrate jong ka East Khasi Hills District i kong Isawanda Laloo, IAS kala pyntreikam ia ka kyndon 144 CrPC na ka bynta ban khang syndon ia ka jingiaid rally jong kino kino ki kynhun kynthup ia ki sengbhalang bapher bapher hapoh ki bynta jong ka nongbah Shillong.
Ia kane ka hukum ka DM kala pynmih hadien ka jinglap ba ka shait jia barabor ka jingkulmar, ka jingshah shoh shah bom ki riew paidbah nongleit nongwan bad ka jingshah pynpait ki kali motor haba don kum kine ki jingiaid rally bala pynlong da ki kynhun ne ki sengbhalang.
Da kaba pynshong nongrim ruh ia ka jingjia kaba dang shudep jia shen ha kane ka 28 tarik mynta u bnai ha kaba kala don ka jingshahbom shahtied jong ki riew paidbah ha ka jingiaid rally jong kawei na ki sengbhalang ha nongbah Shillong.
Kumta ban lait na ka jingsyier jingsmiej jong ki riewpaidbah na ka liang ka DM kala pynjari noh mynta ka sngi da ka kyndon 144 CrPC ka ban treikam naduh mynta ka sngi tad haduh ban da pynmih hukum da kumwei pat.
Kane ka hukum kala khang bad mana ba ym shuh ban pynlong ia ki jingiaid paidbah (rally) ne ka jingialum jong ki briew kaba palat ia ki 5 ngut da ka jingthmu ban iaid paidbah ha baroh ki bynta jong ka nongbah Shillong.
Lada don kino kino kiba ialeh pyrshah ia kane ka hukum yn pynshitom ia ki katkum ki kyndon aiñ pynshem shuh shuh ka hukum bala pynmih mynta ka sngi.
Hynrei kala don ka jingpynjynsur ha kane ka hukum namar ba kane ka hukum kan ym khang ia kino ki jingiaid paidbah ban pynlong da ki seng niam bapher bapher kiba la ioh jingbit shwa na ki bor pyniaid District.