Ka lympung ïalehkai phutbol jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun na ka liang ka kynhun ïalehkai jong ka Shangpung Moosyiem SC kala lah ban pynliem da 5-1 kol ïa ka Sailung Ialong SC, ïa kitei ki kol na ka Shangpung Moosyiem SC la thep da u Kenny Langbang ar kol ha ka minit ba 15 & 84, u Remine Papang ar kol ha ka minit ba 27 & 52 bad u Mewothi Sungoh ha ka minit ba 61.
Katba ïa ka shikol na ka Sailung Ialong SC la thep da u Mebakynsai Pale ha ka minit ba 59, haduh ba kut jong ka jingïakhun kala neh da 5-1 kol.
Ka jingïalehkai lashai ka sngi 03 tarik u Naiwieng kan long hadpeng ka Chilliangriaj SC pyrshah ïa ka Wahiajer SC ha ka por 2 baje shiteng nohphai sngi.