Ka lympung ïalehkai phutbol jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun mynta ka sngi na ka liang ka kynhun ïalehkai jong ka Wahiajer SC kala lah ban pynliem da shikol 1-0 ïa ka Chilliang Raij SC. Ïa katei ka kol na ka Wahiajer SC la thep da u rangïalehkai jong ka u Ezekial Phawa ha ka minit kaba 14.
Katba na ka liang ka Chilliang Raij SC kala pyrshang ban pynphai kylla ïa katei ka shikol, hynrei haduh ba kut jong ka jingïakhun kam shem la lad satia ban pynkhih ïa ka jar bad kane ka jingïakhun hapdeng kine ki ar kynhun kala kut noh da 1-0 kol.
Ka jingïalehkai lashai ka sngi 04 tarik u Naiwieng kan long hadpeng ka Dulong SC pyrshah ïa ka Demthring SC ha ka por 2 baje shiteng nohphai sngi.