Ka lympung ïalehkai phutbol jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun mynta ka sngi na ka liang ka kynhun ïalehkai jong ka Dulong SC kala lah ban pynliem da 3-1 kol ïa ka Demthring SC, ïa kitei ki lai kol na ka Dulong SC la thep da u Dao Chwa Shylla ar kol ha ka minit ba 2 & 16 bad u Wallam jingsuk Suting ha ka minit ba 68.
Katba na ka liang ka Demthring SC ka thep ïa ka shikol lyngba u Spain Ryngkhlem ha ka minit kaba 64, haduh ba kut jong kane ka jingïakhun kala neh da 3-1 kol.
Ha ka sngi nyngkong jong ka 7.11.2022 ka jingïakhun kaba nyngkong kan long hapdeng ka Chilliang Raij SC pyrshah ïa ka Moosalyngkat SC ha ka por 12 baje mynsngi, katba Mukhla Raij SC pyrshah ïa ka Wahiajer ha ka por 2 shiteng nohphai sngi.