U Myntri Rangbah ka Jylla u Conrad K. Sangma mynta ka sngi ula ong ba ka Sorkar wat hapdeng ki jingeh ba bun kiba ka ia kynduh ha ka liang ka pule puthi hynrei ka dang iai trei shitom da ka jingkut jingmu ban wanrah ia ka jingnang jingstad kaba paka tam sha ki nongpule baroh ia kane ula kren ha ka jingrakhe Golden Jubilee ka St. Thomas Higher Secondary School ha Mairang Eastern West Khasi Hills.
Ula ong ruh ba ka jylla Meghalaya kala nangiaid shaphrang ban kynjoh sha ka thong ban long kawei na ki jylla kiba biang eh ha pule puthi. Ula pynpaw ba ka tnad pule puthi ka ia kynduh shibun ki jingeh bad kam long kaba suk ban trei, kum ka sorkar ka iakynduh shibun ki jingeh, ban kyntiew ia ka pule puthi la ha sorbah, ha ki sor rit bad wat ha ki thaiñ nongkyndong, hynrei la katta ka Sorkar kam shym la shong kli kti bad ka dang thaw ki lad ki lynti ban wanrah ia ka pule puthi kaba bha eh hapoh ka jylla.
U Conrad ula pynkynmaw ba ha u snem 2018 ka Jylla Meghalaya kala wan ha ka kyrdan kaba ha trai duh ha baroh ki liang kam pynroi, hynrei mynta ka Jylla kala kiew ha kiba bun ki liang bad kala ioh ruh ka jingiaroh na ka sorkar Pdeng bad wat na shabar ri ruh.
Ula ong ba ka jylla kala ju don ha ka kyrdan kaba shatraiduh ha ka liang ka jingaitika bad jingpynjaw dawai ha u snem 2018 kata ha ka kyrdan kaba 27, hynrei mynta kala wan poi ha ka kyrdan kaba 2 hapoh ka ri. U ong ba ka sorkar ka kut jingmut ban wanrah shibun ki jingkylla hapoh ka jylla la kadei ha ka liang ki kam jngohkai pyrthei, ka koit ka khiah, ka jingsengkam lajong bad kiwei kiwei de.
Ha kane ka sngi u Myntri Rangbah ula ioh ruh ban buh mam nongrim ia ka jingtei ia ka Gallery jong ka St. Thomas Football Ground bad pynkup burom ia ki kynnah jong ka skul kiba la poi shakhmat ha ki jingialem eksamin jong ki.
Ha ka juh ka sngi ruh ula plie pyrda ia ka Computer Laboratory jong ka Presbyterian Science College kaba la mang pisa na ka Chief Minister’s Special Development Fund kaba la kot sha ka Rs.6.77 lak.
Ha kane ka juh ka sngi u Myntri Rangbah ula iashim bynta ruh ka jingpynkut ia ka jinglehkmen jong ka College Week ka Khadsawphra Colloge ha Mairang. U Myntri Rangbah u la pliepyrda ruh ia ka Extension Building bad ka College jong kane ka College. Ha kajuh ka por ula pynbna jingiarap haduh Rs.20 lak tyngka sha kane ka College lyng ka skhim CMSDP na ka bynta ban pyndep shuh shuh ia ki bynta ba dangsah jong ka Extension Building ka College.
