Ka Meghalaya Bharat Scouts & Guides, West Jaiñtia Hills kum shibynta ka dak jong ka jingkynmaw burom ïa ka jingïaidlynti ba 73 tylli ki snem jong ka Seng ba la tip kum ka Foundation Day mynta ka sngi 11 tarik November ka la pynlong ïa ka jingïakynduhlang ba kyrpang ha District Headquarter, Jowai.
Ha ka jingïalang ba la pynïaid da u Adiam U Bthuh, District Secretary MBS&G-West Jaiñtia Hills kat kum ka rukom dustur jong ka Bharat Scouts & Guides ki dkhot ki la ïashim bynta ban rwai ïa ka Prayer Song bad pynkut pat ïa kane ka jingïakynduhlang da ka jingrwai ïa ka National Anthem.
Ha kane ka jingïakynduhlang nalor ki Scouts-Guides, Rovers-Rangers bad ki Unit Leaders lawan ïashim bynta ruh da ka S. Tariang, Vice-President, MBS&G-West Jaiñtia Hills kum ka kongsan bad u D.E. Pariat, Principal Lissi Pearl Secondary School Mukhla kum u Symbud kongsan ha ryngkat ka jingïadonlang ka Rosie Bang, DOC (G) bad u Carefully Gassah, DOC (S).
U D.E. Pariat haba kren u la pynkynmaw ïa ka jinglong kyrpang jong kane ka sngi bad u la khot bad wer ruh ïa ki paradkhot ba kin shim ka jingkitkhlieh ha kaban leh ïa ki kam babha na ka bynta ka imlang sahlang jong ka ri bad ka jaitbynriew.
Ka S. Tariang, Vice-President, MBS&G-West Jaiñtia Hills haba kren ka la ong haba shim ban kynmaw burom ïa ka Foundation day ka dei ruh ka por ba ngin kynmaw burom ïa u Nongseng ka Movement u Lord Baden Powel bad ki nongprat lynti ïa ka Seng ha ka Ri bad ka Jylla.
Shuh shuh ka la pynkynmaw ruh ïa ki para dkhot ïa ki nongrim treikam jong ka Movement bad ki kamram ba dei ban leh kumba la shim ïa ka Jingkular ban shakri ïa ki parabriew da ka jingsngewieit bad jingsngew burom khlem da wanrah ka jingsngewïapher.
Shwa ban poi shaba kut jong kane ka jingïakynduhlang ladon ruh ka jingpynlait ïa ki 73rd Foundation Day Sticker bad ka jingpynkup burom ïa ki Unit Leaders ba la ïoh ïa ka nam Best Scouts Master-Best Guides Captain.
