Ka lympung ïalehkai phutbol Semi Final jong ka kyrdan 1st Division Football Tournament, 2022 ïa kaba la ai kyrteng ka ‘Chatister Kharkongor Memorial Trophy’, kaba la long mynta ka sngi ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun Semi Final ba nyngkong kala long kaba noh shilling namar ka kynhun ïalehkai jong ka Sailung Ialong SC kala lah ban pynliem da 9-0 kol ïa ka Nangbah Iawmusiang, ïa kine ki kol la thep ar kol da u Batskhem Dhar haka minit ba 19 & 21, u Da-u-ruhi Pale hynriew kol ha ka minit ba 45, 47, 55, 63, 75 & 85, u Jefkeemanson Rymbai shikol haka minit ba 89. Lyngba kane ka jingjop ka Sailung Ialong SC kala buh jaka ïalade ha ka phainal jong kane ka lympung mynta ka snem.
Katba ka jinïakhun Semi Final ba ar lashai ka sngi ka 12.11.2022 kan long hapdeng ka Moosyiem Shangpung SC pyrshah ïa ka Mukhla Raij SC ha ka por shi baje shiteng noh phai sngi.