Rakhe Children’s Day ki Pulit ka 6th BN MLA Umran, kyntu ia ki khynnah ban pyndep ia ki jingpule

Ha ka jingrakhe ia ka sngi jong ki khynnah ne ka Children’s Day mynta ka snem (2022) na ka liang ka 6^th Battalion Meghalaya Police, Umran; Police Training School and Meghalaya Police Academy, Umran kala pynlong ia ka prokram ha kane ka 12 tarik mynta u bnai na ka bynta ban pynkmen pynsngewbha ia ki 200 ngut ki khynnah skul jong kane ka thaiñ.

            Ia kane ka prokram la pynlong da ka jingiasnohkti lang ka Meghalaya State Legal Services Authority and Faith Foundation, Shillong bad ka phang pdeng jong kane ka sngi ka long “Back To School – Safety & Security”.

            Na ka liang jong ki Pulit jong ka 6^th BN MLP bad PTS/MPA, Umran, ha kane ka sngi kila kynmaw ia ki sngi ka jingleit skul jong ki da kaba kila riam da ki Uniform skul barim jong ki bad kila ioh ban ia pynbyrngia lang bad ki khynnah skul kiba la poi sha kane ka prokram.

            Ka jingthmu kaba kongsan jong kane ka prokram ka long ban pynsngewthuh sha ki khynnah halor ka jingdonkam ban bteng ia ka jingpule jong ki ha ki skul tad haduh ba kin da pyndep ia ki jingpule jong ki. Ha kajuh ka por la kyntu ruh ia kito ki khynnah kiba la pep skul shiteng por ba kin wan biang sha ki skul jong ki bad ban pyndep haduh ban da kut ka jingpule, khnang ba kan long ka jingiada ia ka hok jong ki ha ka liang ka bor met, bor jabieng, ha ka imlang sahlang bad ha ka ioh ka kot.

            Ia kane ka prokram la sdang naduh ka por 9:00 AM ha kaba ki khynnah skul kila ioh ban iakren bad twat jingmut bad ki bor Pulit lyngba ka exhibition kaba la pyni shaphang ka jingtreikam jong ka tnad Pulit, ka jingiada na ka jingpluh ding, ki tiar ki tar kiba iadei bad ka jingphah khubor jong ka tnad Pulit, ka jingpynsngewthuh halor ki kam sniew ne kam beaiñ kaba long pyrshah ia ki kynthei khynnah, ka jingai jinghikai halor ka koit ka khiah, ia kaba la pyni lyngba ka Meghalaya State Legal Services Authority and Faith Foundation, Shillong.

            Ha kane ka sngi kala don ruh ka jingiakop ha ki bynta bapher bapher jong ki khynnah skul, ka jingpynbyrngia da ka Meghalaya Police Cultural Troupe kaba la ai jingrwai bad jingshad ia ki khynnah. Kala don ruh ka jingsam ia ki prais sha baroh ki nongiashim bynta.

            Ia kane ka khubor la pyllait da u Commandant ka 6^th BN MLP, Umran u bah Lakador Syiem, MPS.