Ka lympung ïalehkai phutbol ba la tip kum ka ‘Open To All Knockout Football Tournament, 2022’ ba la pynïaid da ka West Jaiñtia District Sports Association (WJDSA) kaba la long mynta ka sngi 14 tarik u Naiwieng ha madan Kiang Nangbah Stadium, Dongmihsngi Jowai.
Haba phai sha ka jingïakhun ba nyngkong na ka liang ka kynhun ïalehkai jong ka PHE XI kala lah ban pynliem da 3-0 kol ïa ka 7 wasa United, ïa kitei ki kol na ka PHE XI la thep da u Lastborn Suting ha ka minit ba 25, u Endingborn Lyngdoh ha ka minit ba 62 bad u Primrose Lamat ha ka minit ba 79.
Katba ha ka jingïakhun kaba ar ka kynhun jong ka Nonglamin Nongtalang kala pynliem da 2-1 kol ïa ka Chnongrim, ïa ki ar kol na ka Nonglamin Nongtalang la thep da u Mahrhen Lyngdoh Giri ha ka minit ba 58 bad u Puson Rymbui ha ka minit ba 70. Katba ïa ka shi kol na ka Chnongrim la thep da u Lambha Sukhlain ha ka minit ba 34. La pyntip ba ka jingïalehkai lashai ka sngi 15 tarik ha ka por 12 baje mynsngi kan long hapdeng ka Jaraiñ FC pyrshah ïa ka Chirupdeilang, katba ha ka por 2 baje nohphai sngi ka Mukha Ialong pyrshah ïa ka Lama Youth FC.