U MLA ka thaiñ ma Wailadmiki Shylla mynta ka sngi ula ioh ban plie pyrda ia ki jaka set kali (trok), buh JCB bad kiwei de ki kali ba pyndonkam da ka Jowai Municipal Board, kumjuh ruh ha ka ban leh burom ia ki kynhun kiba iadon bynta lang bad ka JMB ban wanrah ia ka jingkhuid jingsuba hapoh ka nongbah Jowai.
Ha kaba iadei bad kane la pynlong ia ka jingialang ha pyllaw jong katei ka ophis kaba don ha ka shnong Khimusniang, Jowai, ha ka jingiadonlang u Deputy Commissioner ka District u bah B.S. Sohliya, IAS, u Chairman ka JHADC u Dr. Sankey Shangpung, u Chairman ka JMB ba Lasoki D Lakiang bad ka CEO ka JMB kong B. Blah bad kiwei ki shah khot sngewbha nalor ki nongtrei jong kane ka ophis.
Ia kine ki jingpyntrei ka JMB kala ioh jingiarap pisa lyngba ka 14th bad 15th Finance Commission jong u snem 2020-21 kaba la kot sha ka T.1,13,00,000/- (Shi Klur Khadlai Lak) tyngka.
Na ka liang jong u ma Wailadmiki ula iaroh ia ka JMB kaba la iadon bynta ha ka jingshakri paidbah khamtam ha ki por jong ka jinglynshop jong ka Khlam Covid-19 ha kine ki snem bala lah. Ula pynkynmaw ia ki kam pynroi kiba la wanrah da ka sorkar na ka bynta ka jingmyntoi jong ki paidbah. U la ong ruh ba shibynta ban wanrah ia ka jingkhuid jingsuba hapoh ka nongbah Jowai na na liang ka sorkar kala thied ia ki jaka pynlang ñiut kiba pynsuk ban pyniakhlad ia ki jakhlia ba pyut bad ki bym pyut. Kumta ula kyntu ia ki paidbah ban don ka jingiasnohkti lang bad ka JMB ha ki liang baroh.
U Deputy Commissioner bah B.S Sohliya, haba ai jingkren ula batai halor ka jingiadon bynto jong u bad ka Shillong Municipal Board ha ka por ba u bat kum u CEO, u ong ba ka jingpyniaid ia ki jakhlia kam long kaba eh, hynrei ka long kaba donkam ia ki nongshong shnong ban don ka jingsngewthuh nalade bad ka jingiatrei lang ban ioh ia ka jingkhuid jingsuba. Ban ioh ia kane ka thong ka donkam ban sdang nala ïing, da kaba sdang noh ban pynduna katba lah ia ka jingpynmih ia ki jakhlia na ki ïing ki sem.
Ka ADC bad CEO ka JMB kong B. Blah kala ai khublei ia ki kynhun ba iatreilang bad ka JMB ban wanrah ia ka jingkhuid jingsuba jong ka shnong Jowai. Ka kong Blah kala ong ba ka JMB nalor ba ka don bynta ha ka jingpynkhuid pynsuba hynrei ka don bynta ruh ha kaba wanrah ia ki kam pynroi kum ka jingshna ia ka surok na pyrshah DC ophis Jowai sha Wahnangbah Road- Iawmusing, ia kaba la ioh jingiarap pisa na ka 15th Finance Commission, ka jingshna ia ki jaka leit painkhana (Individual Household Toilets) bad kiwei de. Ka jingpynkhuid ia ka Wah Myntdu da kaba buh ia ki jaka ban iada ia ki jakhliah ba tuid lyngba ki 11 tylli ki wah duid na ki dong bapher bapher.
Kala ong shuh shh ba ka ophis kala pyntreikam ia ka Welfare Scheme lyngba ka DAY-NULM da kaba pynioh jingiarap T.10,000/- sha ki SHG, ka jingai ram sha ki 30 ngut ban seng kam lajong ha ka dor T. 2 lak marwei. Ka jingiarap pisa ia ki nongdie rud surok lyngba ka skhim PM Svanidhi ha ka dor T.10 hajar kum ka jingsiew ba nyngkong, nalor kiwei de ki kam kiba ka JMB kala leh.
Kiwei de kiba la kren ha kane ka jingialang ki kynthup ia u ma L.D Lakiang, CEO ka JMB, u Dr. S. Shangpung Chairman ka JHADC bad kiwei de.
Ha kane ka sngi la sam ruh ia ki syrnod sha ki kynhun kiba iadon bynta lang bad ka JMB halor ka phang “Kee Jowai Town Clean” kum ka Society for Urban and Rural Empowerment (SURE), Young Minds Collective (YMC), ka Bharat Scout and Guide bad ka Synjuk ki Waheh Shnong. La sam ruh ia ki borti pynlong ñiut sha ki School bad ki College.