Ka jingialehkai Judo ruh ka kylla long kawei na ki lympung kaba shongshit bha ha kane ka lympung iakhun jong ka North East Olympic Games kaba pynlong ha kane ka jylla mynta ka kynti.
Ha ka jingiakhun kaba pynlong ha Indoor Stadium jong ka Laban Sports Club, Shillong ha ka thup kiba hapoh 73 kilo jong ki shynrang ia ka takma ksiar la ioh da u Kamdon Boi jong ka Arunachal Pradesh, katba u S Rohit na Manipur u iohi ia ka takma rupa bud sa ka takma rnong ba la ioh da u HC Lalchungnunga ka Mizoram bad Victor Deb jong ka Meghalaya.
Ha ka thup ialehkai jong ki kynthei ba hapoh 63 kilo, ka Kalpana ka la khur takma ksiar na ka bynta ka Manipur, katba ka Yari Maying na Arunachal Pradesh ka khur takma rupa bud pat sa ka Doli Gogoi jong ka Assam bad Lalnunfeli jong ka Mizoram ia ka takma rnong.
Ha ka thup ki shynrang ba palat 73 kilo ka jingkhia, u Venuze Dawhuo u la khur ia ka takma ksiar na ka bynta ka Nagaland bud sa u Th Athoiba na Manipur ia ka rupa katba u Lalhrezuala na Mizoram bad Anjalu Basumatary na Assam ki la ioh ban khur ia ka takma rnong.
Ha ka thup ki kynthei ba 63 kilo shaneng, ka Manipur ka la khur biang ia ka takma ksiar lyngba ka Th Gangarani bud sa ka Meghalaya ia ka takma rupa lyngba ka Radika Boro katba iaka takma rnong pat la ioh da ka Lalkimizimi jong ka Mizoram bad Rani Boro jong ka Assam.