Ka Mizoram ka la pyniam kthang ia ki paid nongkyrshan ka Meghalaya hadien ba ka lah ban khur ia ka jingjop da 2-1 ha ka jingiakhun final jong ka U-21 ki shynrang ha ka 2nd North East Olympic Games 2022 kaba la long hynne ka sngi ha madan MFA, Polo.
Hadien ka jingbym lah ban thep kol ha ka kylla step, u Rohlupuia u la ioh ban pynkhih jar nyngkong eh na ka bynta ka Mizoram ha ka minit kaba 54 bad ia ka kol kaba ar la thep da u Malsawmtluanga ha ka minit kaba the 80. Hashwa ban kut ka jingialehkai u Oresterwell Langshiang ula lah ban pynphai kylla na ka bynta ka Meghalaya ha ka minit kaba 87 bad hadien kam shym la lah shu ban pynphai ha kaba ka la mad ia ka jingshah rem.
Ha kane ka jingialehkai final la wan ban sakhi da ki hajar ngut ki paidbah na ka bynta ban ai mynsiem ia ki jong ki rangialehkai ha kaba ki la pyndap hi smam ia ki jaka shong ha madan Third Ground bad ruh ha SSA Stadium wat hapdeng ka jingshit jong ka sngi. Da ka jingkhmih lynti ia ka jingtiud ki paidbah, ka Meghalaya Football Association ka la buh da ki giant screen ha madan First Ground bad ba ki lah ban sakhi ia katei ka jingialehkai.
Ha kane ka jingiakhun ka Meghalaya ka la sdang ban kulmar jingmut ha kaba sdang, hynrei ki rangialehkai ‘dien ki la lah ban iashan ban pyllait na ka jingshah thep.
Hapoh ki 10 minit ka Mizoram ka la pyrshang ban ialehkai bha, hynrei ki rangialehkai ka Jylla ki la lah ban iashan tyngeh ban pyllait na ka jingshah thep.
Hynrei tang mar iasdang ka jingialehkai jong ka kylla miet, u Rohlupuia u la ioh ban shut ia ka bol ha kaba ka la leit dei na u rangapkol u Rajat Paul Lyngdoh, hashwa ba kan rung sha kol.
Hadien katto katne por ka Meghalaya ka la ioh ia ki katto katne ki kabu ksiar, hynrei u Everbrightson Mylliempdah u la pynlehnohei bad u Figo Syndai um shym la lah ban thep na ka daw ka jingiashan tyngeh u rangapkol ka Mizoram.
Hadien katto katne por, ka Mizoram ka la ioh ia ka kabu kaba biang lyngba u Mawawmtluanga na ka bynta ban thep ia ka kol kaba ar.
Sa tang 10 minit shwa ban kut ka jingialehkai, ka Meghalaya ka la ioh ia ka kabu kaba biang ban pynphai lyngba u Oresterwell Langshiang.
Wat hapdeng ka jingai mynsiem jong ki paidbah, ka Meghalaya kam shym la lah shu ban pynphai bad ha kaba kut ka Mizoram ka la khur ia ka jingjop.
Ha kawei pat ka jingiakhun final jong ki kynthei U-17, ka Manipur ka la pynliem noh ia ka Arunachal Pradesh da 4-0 kol.
Ha kane ka jingiakhun kaba khatduh ka S. Lynda Kom kaba la khur ia ka nam Player of the Match u la the par kol (29′, 44′) ha ka kylla step hashwa ba ka Manipur kan pynbud biang sa ar kol ha ka kylla miet lyngba ka L. Babina Devi (62′) bad ka L. Shelia Devi (87′) na ka bynta ban khur syndon ia ka jingjop.
Kane ka takma ksiar ka la long ka jingiarap ia kane ka kyhhun ban don ha ka jingiaknieh na ka bynta ban khur ia ka nam lahduh ha ka NEOG 2022, namar hynnin ka miet ka Manipur ka la tam ia ka Assam haka jingioh khur takma da 78 la 75 bad mynta ka la kynjoh sha ki 79 tylli ki takma ksiar.
Ia ki khusnam kyrpang ha ka U-17 women, ka Keisham Melody Chanu na Manipur (Golden Glove), Loktongbam Shelia Devi na Manipur (Golden Boot), Angel Tamang na Arunachal Pradesh (Player of the Tournament). Ia ki khusnam ha ka U-21 men, u H Lalrinzuala na Mizoram (Golden Glove), Joseph Lalvenhima na Mizoram (Golden Boot) bad u Figo Syndai of Meghalaya (Player of the Tournament).
Ia ki khusnam la sam da u Myntri Rangbah ka Jylla u Conrad K Sangma, ryngkat u Myntri ka tnat ialehkai u Bah Banteidor Lyngdoh, u Chief Secretary Bah Donald P Wahlang bad kiwei ki heh ophisar kiba la iadon lang ha kane ka sngi.
