Mynta ka sngi u Myntri ba dei peit ia ka tnat C&RD u Hamletson Dohling ha ka jingdon ryngkat u Myntri ki kam rep ka jylla u ban Banteidor Lyngdoh la buh ia u maw nongrim ha Mawkynrew na ka bynta ban tei ia ka ophis thymmai jong ka Mawkynrew C&RD Block.
Haba ai jingkren ha kane ka sngi u bah Dohling ula ong ba ki Block ophis ki long kum ka jingkieng kaba pun hapdeng ka sorkar bad ki paidbah, namarkata ka long kaba donkam bha ban pynbha ia ki jingtei bad pynbiang ia ki jingdonkam jong ka ophis khnang ba yn lah ban ai ka jingshakri kaba paka sha ki paidbah.
Ula ong ba na ka liang ka sorkar jylla kala mang pisa haduh T.120 klur na ka bynta ban pynbha haduh 40 tylli ki Block ophis hapoh ka jylla, ha kaba T.2.77 klur la mang na ka bynta ka Mawkynrew Block.
Ula iaroh ruh ia ka jingtrei shitom jong ka ophis Mawkynrem Block ban pyntyllun ia kiba bun tylli ki skhim kiba wan lyngba ka sorkar jylla bad kumjuh na ka sorkar kmie. Ula ong ruh ba ka long ka jingiaroh ia kane ka Community and Rural Development kaba la lah ban pynlong ia ka jingtrei 100 sngi kaba jop, kumjuh ka jingkiew jong ka jingdon ki SHG hapoh ka jylla hapoh kine ki khyndiat snem.
Kiwei de kiba ai jingkren ha kane ka jingialang ki kynthup ia u bah Banterdor Lyngdoh, u S.C. Sadhu ba dei u Director C&RD nalor kiwei de.