Ka West Jaiñtia Boxing Association (WJBA) bad ka Meghalaya People United Front (MPUF) ha kane ka sngi saitjaiñ kila pdiang bad leh burom ïa ki lai ngut ki rang ïakura (boxing) napoh ka West Jaiñtia kiba la wan ban ïashim bynta ha ka 2nd North East Olympic Game 2022 ha nongbah Shillong.
Kine ki nongïa kura napoh ka West Jaiñtia Hills ki don haduh saw ngut kiba leit ban ïakhun sha katei ka lynpung kiba kynthup ïa u Bhalang Shadap na ka shnong Narwan ha ka kyrdan 63.5-67 kg uba la ioh rong ia ka takma ksiar, u Badon Kupar Synnah na Ladthadlaboh, Jowai ha ka kyrdan 57-60 kg uba la ioh khur ia ka takma ksiar, u Baïamutlang Sungoh na ka shnong Mynso-A ha ka kyrdan 60-63.5 kg Uba la ïoh ïa ka takna rnong bad kawei ka kynthei ka Thridisia Lamare na Ladthadlaboh.
Na ka liang ka WJBA bad ka MPUF kila pdiang sngewbha ïa kine ki lai ngut ki rang ïakura na surok bah hajan ka pung Thadlaskeiñ ha ka jingsynran lang jong kiba haïing ha seng bad ka tnad pulit haduh ban da poi ha Ladthadlaboh hajan ka madan dai masi bad la pynlong ïaka prokram leh burom ïa ki.
U samla Baïamutlang Sungoh haba kren ula pynsngew ba kumba long mynta ki don shibun ki jingeh kaba ki ïakynduh kata naduh naduh ki jaka Hall ban kilan, ki tiar ki tar bad kiba bun ngi hap ban thied da lade, u buh ka jingkyntu lada don kiba kot ka bor kin sngewbha ban ïarap ban pynïoh ïa ka jaka kilan namar kum ki rang ïakura ki don jingmut ban ïakhun shabar jong ka jylla ruh bad ha ka juh ka por ka pynmih shuh shuh ïa ki khlur ïakura (Boxing) na ka District.
Ha ka juh ka por u kyntu ïa ki para samla ba kin don ka jingïaleh ha ka jingim la ha kino kino ki kam ïalehkai bad ban don ka jingtrei shitom haduh ban da poi sha ka thong. Wat ha por ba kynduh jingeh ha ka liang ka pisa, hynrei kim dei pat ban long ki maw jynthut lada don ka mon bad ka jingshaniah ha u Blei ka sa long beit ka jingjop ha ka jingim. Ha kane ka sngi leh burom la donlang u MDC ka Shangpung u ma T. Suchiang, u Adviser ka WJBA ma Rudolf E. Laloo , u OC ka Jowai Police Station ma S. Manner lem bad kiwei de.
