Ki bor pynïaid jong ka Ramakrishna Mission Sohra hynnin ka sngi saitjaiñ kila ïoh ban plie paidbah ïa ka Ramakrishna Mission Charitable Dispensary Jalaphet Bri-Sumer East Jaiñtia Hills, ha ka jingwan sakhi lang jong ki nongshnong shnong ka thaiñ lem bad ki khynnah skul.
Hashwa kane la don ka jingïalang bad la ïoh ki kyntien pdiang na u Secretary ka Ramakrishna Mission Sohra bad la ai khublei kyrpang ïa u ma Manbha Lyngdoh uba long u rishot bah ban peit ïa ka bha ka miat jong ka Mission hapoh kine ki thaiñ jong ka Jaiñtia Hills.
Na ka liang u kongsan uba dei ruh u MDC ka thaiñ ma Krison Langstang ula ai ki kyntien ai khublei ïa ka jingwan jong kane ka Mission hapoh jong ka shnong ban buh syndon ïa kane ka jaka ai dawai ei ha ka liang ka jingkoit jingkhiah jong ki paidbah.
La ïoh ruh ka jingkren na u ma Manbha Lyngdoh uba long uwei na ki nongpeit ïa ka Mission hapoh Jaiñtia Hills, shuh shuh u ong ba ka jingwan kane ka Mission ka long shi bynta ban ai jingshakri ïa ki para briew kaba mut ka jingshakri ïa u Blei.
Ula ïathuh ba ka jingplie ïa kane ka jaka ai Dawai Dispensary kan long ka jingmyntoi kaba khraw namar yn ai makna ïa kiba wan shim dawai bad ka jingleh check-up na ki Doctor. Ha ka juh ka por la kyntu ïa ki paidbah khamtam kiba duna ha ka jingïoh jingkot ba kin leit ban shim dawai na katei ka jaka.
