U Myntri Rangbah ka jylla u Conrad K Sangma, mynta ka sngi ula plie pyrda ia ka International Inter-Disciplinary Seminar halor ka phang ‘Look South Policy vis-à-vis Meghalaya’ kaba la pynlong ha Synod College, ha nongbah Shillong.
Haba kren ha ka jingialang plie u Conrad ula ong ba ka Look South Policy ka long kaba donkam haduh katta katta na ka bynta ka jylla Meghalaya bad ka ri India hi baroh kawei. U la ong ruh ba ka jingiasnohktilang jong baroh ki jylla ka thaiñ Shatei Lammihngi ka long kaba donkam haduh katta katta na ka bynta ka jingkiew shaprang jong ki kam khaïi pateng bad ka roi ka par jong kane ka thaiñ.
Ula pynkynmaw ba ia ka thaiñ Shatei Lammihngi bad ka jylla West Bengal la pyniakhlad tang kumba 80 Kms lyngba ka ri Bangladesh kumta lada don ka jingpyniasoh lyngba ka Bangladesh sha kine ki thaiñ kan long kawei pat ka lynti ban kyntiew ia ka ioh ka kot ka thaiñ, namar kan pynduna ia ka jingjngai ka jingiaid lynti.
U Myntri Rangbah ula pyntip ruh ba ka sorkar ka dang wad ki lad mynta ban buh ia ki ‘Conveyor Belts’ kiba lah ban shalan ia ki mar lyngba kine ki tylla nangne na ka jylla Meghalaya shaduh sha ka ri Bangladesh, lada lah ban pyntreikam ia kane ka projek kan sa wanrah ka jingioh jingmyntoi ia ka jylla.
Shuh shuh ula ong ba ka rep ka riang ka long kawei na ki kam kiba lah ban kyntiew ia ka ioh ka kot da ka jingiashaniah ba markylliang hapdeng ka ri India bad ka ri Bangladesh. Kumta ka long kaba donkam bha ia ki samla pule ban don ka jingiasyllok ba ki jingiasyllok hapdeng ki nongsengkam jong ka ri Bangladesh bad India, namar ba ki dei ma ki, ki lawei ban pynurlong ia kane.