Ki sengbhalang kiba kynthup ïa ka KSU, JSU, JSM, LNPC, FKJGP, RBYO, HPSO, JYF, JACBOM, STIEH, HITO, HBDRF bad kiwei de ki sengbhalang kiba don hapoh ka Jylla ha ka jingïalang ba kyrkieh jong ki hynne ka sngi ha Madanbol ka shnong Mukroh, West Jaintia Hills, da kawei ka jingmut kila pynpaw ka jingsngewsih kthang mynsiem halor ka jingshah siat pynïap beaiñ ki Pulit Assam bad ki Karbi-Anglong Forest Guard ïa ki 5 ngut ki traishnong na Mukroh bad sa ar ngut kiba la mynsaw jur kiba don hapdeng ka jingshah sumar ha Ialong Civil District Hospital.
Kine ki 5 ngut kiba la shah siat ïap ki kynthup ïa u Tal Nartiang (46), Thal Shadap (45), Sip Talang (55), Si Dhar (65), Shirup Sumer (40), katba kiba mynsaw kiba dang don ha Hospital ki dei u Herin Nartiang bad u Elias Samaiang.
Kane ka jingjia kala jia harud jong ka shnong Mukroh kaba dang hap hapoh u pud u sam ka West Jaiñtia Hills Meghalaya.
Ha ka jingïadei bad ka Police Out Post kaba la mang ban buh da ka sorkar ha shnong Barato, na ka liang jong kitei ki Sengbhalang ki la dawa na ka sorkar ba dei ban buh noh ïa ka ha Mukroh ha ka jaka kaba kine ki Rangbah kila shah siat ïap, kaba kila theh da la ka snam.
Shuh shuh na ka liang jong ki Sengbhalang kila rai ba lada ka sorkar kan buh Police Out Post ha Barato kin leit jynrad ïa u Maw Nongrim bad kin ym shah da lei lei ba ka Police Out Post kan don ha shnong Barato, hynrei ka dei ban don beit ha shnong Mukroh.
Ha kane ka jingïalang na ka liang ki Sengbhalang kila shim rai ban pynlong ïa ka Non-Cooperation Movement ha Ri Lum Jaiñtia ba kynthup ïa ka East bad West Jaiñtia Hills kum ka dak ka jingsngewkhia halor ka jingshah siat beiñ ki 7 ngut ha kaba 5 ngut kila duh ei la ka jingim.
Ki Sengbhalang kila kyntu ïa baroh ki Nongtrei ophis ha ki tnad Sorkar bapher bapher bad ïa ki paidbah jong ka ri lum Jaiñtia ba kin ïasnohkti lang ha ki sngi kiba yn sa pynlong ïa kane ka Non-Cooperation Movement.
Ha kane jingsiat ki Pulit Assam uwei napdeng kine kiba la iap udei u briew jong ka Assam hi uba trei kum u Forest Guard Karbi Anglong. Katkum ka jingshem jong ki paidbah la lap ba ki Pulit Assam kila siat da ki Pistol 9mm haduh 12 round, ki 303 Riffle 18 round, ki 7.62- 21 round bad da ki 5.66 – 4 round. Bun ruh na ki kuli kila poi shapoh shnong sha rud ki ïingbriew.