Mynta ka sngi u Myntri Rangbah duh ka Jylla u Conrad K. Sangma ryngkat bad ki kynhun Myntri jong u kila hiar sa ka shnong Mukroh ban leit sngewlem sha kiba haïing jong ki 5 ngut ki nongshong shnong ka Mukroh kiba la khlad na ka jingshah siat ïap hynnin ka sngi 22 tarik ha ki pulit Assam.
Kiwei de ki myntri kiba la wan ban synran ïa u Myntri Rangbah kynthup ïa u Symbud Myntri Rangbah bah Prestone Tyngsong, myntri pynroi sor ma Sniawbhalang Dhar, myntri ka Revenue ma Kyrmen Shylla, Myntri ka tnad PHE bah Reninton Lyngdoh Tongkhar, u shong knor ka jylla Meghalaya MLA bah Metbah Lyngdoh, u MLA bah Banteidor Lyngdoh, MDC bah Bajop Pyngrop, u MDC ka thaiñ ma Aiborlang Shadap, u MLA ka 4 Mowkaiaw ma Nujorki Sungoh. Kumjuh ruh la iadon lang u Deputy Commissioner ka West Jaiñtia Hills bah B.S. Sohliya IAS, Superintendent of Police WJH u B.D. Marak bad kiwei de ki heh sorkar.
Na ka liang ka sorkar Meghalaya lyngba u Myntri Rangbah duh kum ka dak ka jingsngewlem ïa kiba ha ïing ha sem kiba la duh noh ïala kiba ieit ba thoiñ ka la pynnoh mar 5 lak tyngka ïa kawei kawei ka longïing jong ki rangbah kiba la shah siat ïap ha ki pulit Assam ha kane ka 22.11.2022.
Ha kane ka sngi la pynlong ïa ka jingïalang kaba lyngkot ha ïing jong u Waheh Shnong ma H. Sumer kaba la pynïaid da u ma Comingson Dkhar Chairman ka Labang Nongphyllut Pangam Raliang Area Committee. Hashwa ban ïoh ki jingkren na u Myntri Rangbah la ïoh ruh ki jingkren lyngkot na ki katto katne ki rangbah kiba kynthup ïa u ma M.M Thaiang, ma Philip Talang, ma Hamboi Sumer nalor kiwei de.
Na ka liang jong kitei ki rangbah haba kren ha ka jingïalang kila pynsngew ha u Myntri Rangbah ba ïa ka Police Outpost kaba la mang ban plie ha ka 25 tarik u Naiwieng 2022 ha shnong Barato la dawa ban pynkynriah noh sha Mukroh bad ka jingpynwan ïa ki 36 tylli ki shnong Khasi Pnar kiba shong basah ha Block-1 shapoh ka Meghalaya.
U ma Thaiang haba kren ha kane ka sngi nalor kaba dei ban pynkynriah ïa ka Police Out Post na Barato sha Mukroh ula pynpaw hakhmat u Myntri Rangbah bala donkam ban don ka Separate Gader na ka Assam khnang ba ki pulit Meghalaya kin ïoh ka bor ba pura kumba long ki pulit ha Mizoram bad tang haba la ïoh ka Separate Gader ki pulit jong ka Meghalaya kin don la ka jong ka bor ha kaba ïada ïa u pud u sam.
U Myntri Rangbah Conrad, K Sangma haba jubab halor ka jingdawa ki paidbah ula kular ba ma u, ka kynhun myntri jong u bad ka sorkar jylla kan shimkhia ïa kane ka kam. Ula ong ruh ba ïa kine ki jingeh nalor ka jingshah siat ïap jong ki 5 ngut ki rangbah ka shnong Mukroh lashai kin leit sha bongbah Delhi ban ïakren bad kine ki jingeh bad u myntri ka kam pohïing jong ka sorkar India u Amit Shah bad u ong ruh un sa ïakren halor kine ki jingeh bad u Myntri Rangbah jong ka Jylla Assam ha Delhi.
Hashwa ban pynkut ia ka jingkren jong u, u MYntri Rangbah ula kyntu ia ki paidbah ban long kiba iaishah naba kane ka kam la sngewthuh ba ym lah ban shuleh muk mak hadien ba la mih kane ka jingjia kumba la thum ban pyndep ia ka jingpynbeit pud ha ki bnai ba mynshwa. Hashwa ban ïoh ka jingpynshai na u Myntri Rangbah la ïoh ruh ka jingkren kyntu kynphang na u symbud MYntri Rangbah bah Prestone Tyngsong.