Ka Bosco Pnar Multipurpose Vocational Training Centre, Salini Colony, Mihmyntdu Jowai, ha ka 22 tarik Naiwieng ka la lah ban ai ïa ki syrnod (Certificate) bad ki tiar (Start up tools) sha ki 48 ngut ki Samla shynrang ki ba la dep ban shah hikai ïalade ha ka kam Domestic Electrical Solution bad ka Plumbing General ka ba hap hapoh ka MSSDS Project jong ka batch ba nyngkong.
Ha kane ka sngi la wan ban don lang naduh u MLA jong ka Jowai Constituency Shri Wailadmiki Shylla kum u kongsan ha ryngkat u ma Lambomi Suchen ba long ruh u Skill Development Officer (SDO) jong ka Meghalaya State Skill Development Society lem bad ki samla nongshah hikai (trainees) jong ka Bosco pnar.
Ïa ka jingïalang la pynïaid da u Lambert Lyngdoh, la ïoh ruh ka jingkren na u ma Lambormi Suchen, SDO jong ka MSSDS, ula kyntu jur ruh ïaki samla kiba lah dep shah hikai ba kin long kiba biang por bad kiba tista haka kam jong ki. U ong ruh ba kim dei ban pynsep ei ïaki jinghikai ba ki la ïoh lyngba kane ka project bad ban pyndonkam bha ïaki.
U kongsan ha kane ka sngi u ma Wailadmiki Shylla ula kren bad ban jur ïaki khynnah kiba la dep shah hikai ba lyngba kito ki tiar (start up tools) ba ki lah ïoh, kin pyndonkam hok ïaki bad ban sdang pyntrei kam ïa ki ym dei tang ban shu buh sha kyndong lane pynjah noh ïa ki.
U ong ruh ba ki khynnah kim dei ban ap haduh da don ba ai kam ïa ki lane haduh da ïoh da ki kam ki ba heh hynrei dei ban sdang nyngkong na ki kam barit lane katba ïoh.
Shuh shuh kum ban shu batai, ba ïa kane ka Skill Training lah wanrah da ka Bosco Pnar MVTC Salini Colony-Mihmyntdu-Jowai ka ba don ha West Jaiñtia Hills. Ka long ruh ka Centre kaba la ai jinghikai ïa shibun ki samla ki don hapoh ka thaiñ Jaiñtia bad na kiwei kiwei ruh lyngba ki Skill Training bapher bapher naka por sha ka por.
La ïathuh mynta ka kynti ka long kaba donbok shisha ba la ïoh lad ban ai ka jinghikai kyrpang ïa shibun ki samla shynrang jong ka Thaiñ Jaiñtia lyngba ka Skill Meghalaya project jong ka State Skill Development Society.