Dawa ka HSPDP ban buh ia ka POP ha Mukroh bad dawa pynphai ia ka Block I shapoh Meghalaya
Hadein ka jingshah siat iap jong ki 5 ngut ki Rangbah na ka shnong Mukroh ha ka 22 tarik u Naiwieng hynrei haduh mynta ka sngi ki nongwan sngewlem naduh ki kynhun seng saiñ pyrthei, ki sengbhalang bad ki riew shimet ki dang ïai bteng ka jingwan sngewlem ban pyntngen ïa ki longiing kiba la duh noh ïa la kiba ïeit ba thoiñ ha ka jingsiat ki Pulit Assam.
Ka Hills State People Democratic Party (HSPDP) kawei na ki seng riewlum jong ka jylla hapoh ka jingïalam u President jong ka bah P.K Pangñiang kila wan sngewlem bad ai jingïarap katba lah ei ïa kitei ki long ïing. Ha kajuh ka por na ka liang ka seng ka Labang Nongphyllut Pangam Raliang Council (LNPC) hapoh ka jingïalam u President jong ka ma Loukas Suchiang bad u Secretary jong ka u ma M.M. Thaiang, kumjuh na ki riew shimet kila wan tuid sha Mukroh hynne ka sngi.
Ha kane ka jingwan kine ki nongialam kila ïakynduh ruh ïa u Waheh Shnong ka Mukroh u ma H. Sumer bad ha ka jingïakren na ka liang u bah Pangñiang ula pynrem jur ïa kane ka jingleh jong ki Pulit Assam lyngba ki bor District jong ka Karbi Anglong, kiba la shim ïa ka jingim jong kitei ki san ngut ki nongshong shnong ka shnong Mukroh. Ha kajuh ka por na ka liang ka seng HSPDP kala dawa tyngeh ba ka sorkar Assam ka dei ban pynshitom da kaba set phatok ïa kine ki Pulit ba donkti pynïap briew. Lada ka sorkar Assam kam shim khia ban pynshitom ïa kine ki Pulit siat briew na ka liang ka seng HSPDP kan ym shong kli kti, hynrei kan ïai bteng ban dawa ïa ka hok jong kine ki san ngut kiba la shah siat ïap. Ula ong lada ka sorkar Assam kam sngap ïa ka jingdawa jong ka seng, ka seng kan dawa shaduh ka sorkar India ban pynshitom ïa kitei ki Pulit.
U bah Pangñiang u ong ba na ka liang ka Party HSPDP kan kyntu bad pynbor ïa ka sorkar Meghalaya ba kan dawa tyngeh na ka sorkar Assam ban pynshitom ïa kine ki Pulit pynïap briew. U la ong ruh ba kane ka jingjia ka wan jia ka dei na ka daw jong ka jingbym don u pud u sam uba thikna hapdeng ka jylla Assam bad ka jylla Meghalaya.
Ha kaba ïadei bad u pud u sam na ka liang jong ka Party ka ïeng dawa bad dawa ba ka Elaka Labang Nangphyllut Dolloiship bad Pangam Raliang kaba dei ka bynta jong ka Jaiñtia Hills ka dei ban wan noh hapoh u pud u sam jong ka Meghalaya. Nangta u ong ba kane ka jingïaleh ban pynioh biang ïa u pud u sam jong ka Khasi Jaiñtia kumba u long naduh hyndai hynthai ki bynta jong ka ri Khasi Jaiñtia ka dei ka nongrim jong ka Party naduh bala seng ïa ka ba kan ïaleh ban pynwan biang ïa ki pud ki sam jong ka ri Khasi bad Jaiñtia hapoh ka bri jong u Hynñiewtrep.
Haba ïakren bad ki nongialam shnong ka Mukroh u bah Pangñiang ula kyntu ba kum ki nongkitkam shnong ki dei ban long ki briew kiba jai jai bad kiba don ka mynsiem jingïatylli ban wanrah ïa ka jingshongsuk shongshngaiñ wat lada ka wan jia kum kane ka jingjia hapoh ki shnong ki thaw jong ki. Ha kaba ïadei bad ka Police Out Post kaba la mang ban buh ha shnong Barato la idonkam ban pynkynriah shisiendon sha ka thaiñ Mukroh ban long ka jingïada ïa ki nongshong shnong kiba don ha kine ki jaka ba dang don hapdeng ka jingbym pat beit u pud u sam. U pynkut ïa ka jingkren da kaba ong ba na ka liang ka Party kan yn shong kli kti haduh ba ka Assam kan da pynphai ïa ka Elaka Langbang Nangphyllut Dolloiship bad Pangam Raliang shapoh ka jylla Meghalaya.
Na ka liang ki nongialam jong ka LNPC kawei na ki seng kaba ïaleh bad ïai ïaleh ban pynwan ïa ki jaka jong ka sha Jaiñtia Hills Meghalaya haba kren ha kane ka sngi lyngba u Secretary jong ka u ma M.M. Thaiang ula kyntu ïa ki nongshong shnong ba kin long kiba jai jai wat hapdeng kine ki jingeh kiba ki ïakynduh na ka por sha ka por bad ula kyntu ban don ka jingïatreilang jong ki nongshong shnong kiba don sawdong sawkun jong ka Labang Nangphyllut Pangam Raliang bad ban ïatylli kum kawei haba jia kum kine ki jingeh bad ha ka jingdawa ban pynwan ïa kane ka thaiñ shapoh u pud ka Jaiñtia Hills Meghalaya.
Na ka liang ki nongkitkam shnong ka Mukroh bad kiwei de ki shnong ba marjan ruh kila shim ïa ka rai ban ïatreilang ha kano kano ka jingeh bad ban dawa ba ka sorkar ka dei ban dawa tyngeh ban kem ïa kine ki Pulit siat briew jong ka Assam bad ban pynphai mardor ïa kane ka Elaka shapoh u pud u sam ka Meghalaya khnang kin ym ngat shuh kum kane ka apot nangne shakhmat.