Ka jingkhot pynlong ia ka Non-Cooperation Movement kaba la pynlong mynta ka sngi da ka jingiathylli lang jong ki Sengbhalang ha kylleng ki bynta jong ka Ri Lum Khasi bad Jaiñtia kala long kaba jop pura bad ka long kaba iaid beit iaid ryntih khem da don kano kano ka jingjia ba sngewsih.
Kine ki sengbhalang kum ka dak jong ka jingpyrshah ia ka sorkar jylla halor ka jingbym lah jong ka ban teh lakam ia ka shong suk shong shngaiñ ha ki bynta khappud jong ka Meghalaya bad Assam, kaba la wanrah ruh ka jingshah siat iap jong ki 5 ngut ki rangbah na ka shnong Mukroh ha kane ka 22 tarik mynta u bnai, kine ki Sengbhalang kila pynlong da ka prokam pyrshah kaba la tip kum ka Non-Cooperation Movement.
Mynta ka sngi ki Sengbhalang kynthup kiba don ha Ri Lum Khasi bad Jaiñtia kila mih paitbah ban kyntu ia baroh ki nongtrei sorkar ha ki ophis bapher bapher ban iasnohkti lang ha kane ka Movement jong ki, kum ka dak ban pynpeit shkhor ia ka sorkar halor ka jingeh kaba ki nongshong shnong ka Jylla ki iakynduh. La sakhi ha kiba bun ki bynta jong ki District Headquarters ha kaba ki dkhot jong kine ki Sengbhalang kila leit ban phah khang khyrdep ia baroh ki ophis sorkar kynthup ruh ia ki Bank bad khot ia ka jingiatreilang ki nongtrei sorkar baroh khnang ba ka jingthmu jong ki kan long kiba jop.
[Ka jingmih paidbah ki Sengbhalang ban khang ki ophis sorkar bad ki Bank ha nongbah Jowai]