Ka lympung ïalehkai phutbol ba la tip kum ka ‘Open To All Knockout Football Tournament, 2022’ ba la pynïaid da ka West Jaiñtia District Sports Association (WJDSA) kala jam noh sha ka jingïakhun phainal ka ban long ha ka 3 tarik u Nohprah ha madan Kiang Nangbah Stadium, Dongmihsngi Jowai.
Ïa kane ka lympung la pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Haba phai sha ka jingïakhun Semi Final ba ar mynta ka sngi 29 ka P.H.E kala pynliem haduh 7-0 kol ïa ka Seinpynbhalang Sahsniang. Ïa kitei ki kol na ka P.H.E la thep da u Primrose Lamat ha ka minit ba 3, 45 & 60, u Tiplang Rasmut ha ka minit ba 13, 28 bad u Oshwaki Phawa ha ka minit ba 62 & 84.
Lyngba kane ka jingjop jong ka PHE kan ïakhun phainal pyrshah ïa ka Jaraiñ FC ha ka 3.12.2022 ha ka pot 1 baje nohphai sngi.