U MP ka Lok Sabha na Shillong Constituency u ma Vincent. H. Pala ryngkat ka jingsynranlang u MLA ka thain u ma Shitlang Pale, mynta ka sngi saitjain ki la plie ia ar tylli ki Tpep Thang Briew (Eco Friendly Crematorium) ha shnong Jalapher, East Jaintia Hills District.
Hashwa ban plie ia kine ki ar tylli Tpep thang Briew la don ka jingialang bala pynlong ha Seinraij Secondary School Jalaphet, kaba la pyniaid da u ma Wanki Chyrmang President SR Jalaphet, ha kaba la ioh ia ka nguh blei da u Waheh Kni Living Syrti, la ai jingkren na u ma Wom Chyrmang, ma Shalis Dkhar General Secretary, ma Harwis Phawa President Raij Tuber, ma Rollingstone Dkhar Waheh Shnong Jalaphet Bri Sutnga, ma Philip Pala bad kiwei.
Na ka liang ki nongpyniaid ka Raij ki la ong ba ki lah ban pyndep ia kine ki ar tylli ki Tpep Thang briew dei lyngba ka jingiarap bas bun jong u MP u ma Pala uba la ai mar mar 5 lak tyngka ia kawei ka ka Tpep bad na ka liang u MLA ka thain u ma S. Pale ruh uba la synniang mar mar 5 lak na ka bynta kawei ka Tpep ryngkat ka jingiasynniang lang ki khun ki raiot ka raij.
U ma Shit Pale haba kren u la dap da ka jingkmen kaba khraw kum ha kane ka sngi ba la ioh ban plie syndon haduh ar tylli ki jaka thang briew kiba ka Sein Raij Jalaphet ka khmih lynti baroh shi katta naduh u ma K. Chullai bam kwai ha Dwar u Blei uba long u nonglap ba nyngkong eh ia kane ka Khnap Thangbriew.
Na ka liang u Kongsan u ma Pala haba kren u la pynpaw ka jingkmen ban poi ha kane ka shong kaba dei ka shnong u kpa jong u bad ka shnong ba para marjan jong u, na ka liang jong u ma Pala u la ong ba ka jingiarap jong u sha kane ka jaka thang briew, ka dei ka hok jong ki nongshnong shnong hi, ym dei ba u sei na pla hynrei dei lyngba ka skhim MP, hynrei namar la bun palat kiba la pan ia kum kane kumta u hap ban ai mar khnyndiat.
U la ai ruh ka jingiaroh ia u ma ( L) Kambel Shulai ba lap ia kum kane ka khnap thangbriew namar lyngba kane ka Khnap Thang-briew ka pynduna ia ka jingpyndon ia ki dieng namar lah ban pyndonkam tang khyndiat eh ka dieng thang, kane ka iada na ka jingpynjulor ia ki dieng ki siej nalor ba kane ka Khnap ka pynlait na ka jingsma bad kam shim ruh ia ka por ban thang briew da ki bun bun kynta kum ha kine ki por ba dang pyndonkam da ka rukon thang barim.
