Ka Save Hynñiewtrep Mission (SHM) jong ki san tylli ki sengbhalang ba kynthup ia ka HYN, HANM, JSM, EJNC bad ka CORP mynta ka sngi kila leit ban dawa na u CEM jong ka JHADC u ma Thombor Shiwat ba u dei ban pynrem jur mar mar ia ka jingthoh ba la pynmih da u CEM ka Karbi Anglong Autonomus Council (KAAC) halor ka jingjia shah siat iap ki briew ha shnong Mukroh.
Ka ne ka kynhun kala pyntip ha khmat u ma Thombor Shiwat ba u Tuliram Ronghang uba dei u CEM ka KAAC ula pynmih ia ki jingthoh jong u lyngba ki Social Media kaba ong “We will not compromise with the territory integrity of Karbi Anglong, not even an inch of land will be given away to illegal settlers”, kaba mut ba na ka liang jong u kum u CEM katei ka Council ula kam lut ia kine ki jaka kiba dei hok jong ki Khasi Pnar, da kaba pynpaw ba ki dei tang kum ki phewir ne ki nongshong shnong beaiñ.
Kumta na ka liang ka SHM ka pynpaw ka jingpynrem jur halor kane ka jingthoh laplah une u nongialam ba ha khliehdur ka KAAC, ka seng ka kynnoh ruh ba imat utei u CEM ka KAAC um pat ju tip ia ka khana pateng (History) halor ka khyndew ka shyiap kaba don sha kine ki thaiñ ba ka dang dei ka hok ka bynta jong ki Khasi Pnar. Namar ba ki briew kiba shong ha kine ki thaiñ Mukroh, Psiar, Khanduli bad Block-I (Labang Nongphyllut) kila shong la sah da ki spah spah bad hajar snem, katba ia ka KAAC la shu pynkha tang ha u snem 1952 la pynpaw ka seng.
Kumta ka SHM ka sngewdei ban kyntu ia u CEM ka JHADC ma Thombor Shiwat ba u dei ban pynrem jur ia une u CEM ka KAAS bad ban pynshai paidbah ruh ba ki Khasi Pnar kiba shong ba sah sha kitei ki thaiñ kim dei satia ki phetwir ne ki nongshong beaiñ hynrei ki dei ki trai hok kynti jong ka khyndew ka shyiap ha kitei ki thaiñ.
Ha ka juh ka por kane ka kynhun ki 5 seng ka kyntu ia u ma Thombor ba un ai ka jingiada ia ka khyndew ka shyiap bad u pud u sam jong ki shnong bad ki Elaka kiba hap hapoh ka JHADC khlem kano kano ka jingpyndem. Kila dawa ruh ba dei ban pynkloi noh ia ka jingpynbeit ia u pud u sam hapdeng ka Meghalaya bad Assam da kaba pynshong nongrim na ka History bad na ki map bad ki kot ki sla.
Khadduh eh ka Save Hynñiewtrep Mission ka kloi ban ai ka jingiatreilang bad ka JHADC na ka bynta ban iada ia la u jong u pud u sam.
Ha kane ka sngi ki dkhot jong SHM kila thang syndon ia kitei ki jingthoh jong u CEM ka KAAC kiba ula pynmih lyngba ki Social Media ha khmat jong ka ophis JHADC.