Ka Society for Urban and Rural Empowerment (SURE) lyngba ka project Link Worker Scheme kaba la kyrshan da ka Meghalaya Aids Control Society (MACS) kala pynlong ïa ki artylli ki jingai jingsumar ei (health camp) ha ki artylli ki shnong kiba hap hapoh ka Amlarem Sub Division, West Jañtia hills District.
Ïa kane ka jingai jingsumar ei la kyrshan ruh da ka ophis jong u District Medical Health Officer, West Jañtia hills, Jowai lyngba ki Doctor, ki Nurses bad ki Pharmacist bad kumjuh ruh da ki dawai kiba la pynbiang da kane ka tnat treikam.
Kaba kongsan ruh ka long ba baroh artylli kine ki shnong kiba la pynlong ïa kane ka camp ki dei kiba hap ha thañ ha khappud ka India bad ka Bangladesh.
Mynta ka sngi 30 tarik u November la pynlong ïa ka jingai jingsumar ei la pynlong haka shnong Amlanai kaba hap hapoh ka Eleka Satpator jong ka Amlarem block bad ha kane la wan ai jingïarap da ki nongsumar kiba naka Pdengshakap PHC. Ha ka jingai dawai ei la ïadonlang u Doctor P. Lamare naka Pdengshakap PHC bad ka Nurse Patricia Myrchiang na kane ka juh ka PHC.
Hashwa ban sdang ïa kane jingaidawai la ïoh ïa ka jingïalang kaba lyngkot ïa kaba la ïoh ïa ka jingkren na u Jembis Lamare uba long u Waheh Chnong jong ka shnong Amlanai bud sa ka jingkren na u Doctor P. Lamare na ka Pdengshakap PHC.
Ïa ka jingkren ai khublei la ai da ka H. Buam bad ïa ka jingïalang la pynïaid da ka T. Tongper baroh ar ki dei link worker jong kane ka project kaba la pyntreikam da ka SURE. Sanphew ngut tam ki nongwan shim dawai kila wan shim ïa ka jingsumar kaba la wan rah ha ka shnong jong ki.
Ha ka 26 tarik u November ruh kane ka seng kala pynlong ïa kaba kum kane ka juh ka jingaidawai ei haka shnong Pasadwar. Kane ka jingaidawai ei ka dei kaba la pynkhreh na ka bynta ki artylli ki shnong kata ka Pasadwar bad ka Lumpyngngad baroh ar ki shnong kiba hap hapoh ka Amlarem Sub Division. Ha kane ka jingai dawai la wan ban ai dawai da u Dr. Simon Khonglah uba na ka Dawki PHC bad kumjuh ki nurses ka Sharmala Tongper, ka Genconda Khonglah bad u Venus War ki staff kiba wan na kane ka PHC. Kumjuh ruh ha kane ka sngi la wan ïarap da ka Peaceful Swer, Bilinmon Dkhar bad ka Virginia Pohti ki staff na ka Pasadwar Sub Centre. Ki nongwan shim dawai baroh ha kine ki baroh ar jaka kila ïoh ruh ïa ki dawai ei khlem da hap siew pisa eiei ruh bad ïa kine ki dawai la pynbiang da ka ophis jong u DM&HO West Jaiñtia Hills District.
