Ka Meghalaya Pensioners Association, Jowai Branch mynta ka sngi kala pynlong ïa ka jingpynkup burom ïa u Weibha Nongtdu Lakiang u samla pule ka North Liberty Higher Secondary School, Jowai uba la wan shakhmat eh ha ka kyrdan 3rd Position ha ka SSLC Examination-2022 ba la pynïaid da MBOSE.
Ïa ka jingïalang ha kane ka sngi la pynlong ha Hall jong katei hi ka skul kaba don ha Mookyrdup Jowai, ha kaba la wan ban don lang naduh ki nongpynïaid ka skul, ki dkhot ka Association, ki nonghikai bad ki khynnah skul.
La sdang ïa ka prokram da ki kyntien pdiang sngewbha da u Vice Principal ka skul u babu Rising Kharrngi, la ïoh ruh ka jingkren na u ma L. Shylla President ka Meghalaya Pensioners’ Association uba la pynsngew kum ki khynnah skul “lada ki don shisha ïa ka jingtrei shitom ki lah ban poi beit sha ka thong jong ka jingjop”.
U ma Shylla u la ong ba ka Association manla u snem ka ju pynlong ïa kane ka jingai khusnam sha ki samla pule hynrei mynta u snem 2022 kaba dei ka sien ba ar ka Association kala ïoh biang ban sam ïa kane ka khusnam sha u Weibha Nongtdu Lakiang uwei na ki khlur pule napoh ka Ri-Lum Jaiñtia.
Shuh shuh u ma Shylla ula ong ba ka Association kam dei kaba riewspah hynrei ka don pat ïa ka mynsiem ban kyntiew shaphrang ïa ki samla ha ki jingpule, ha kaba ïadei bad kane ka jingsam khusnam ba la ju leh manla ka por ka Association ka la jied tang ïa uwei ne kawei na ki samla pule kiba poi ha ka kyrdan ba hakhmat duh jong ki Examination.
“Nga kyrmen skhem na kane ka skul kin sa mih bun ki samla pule ki ban poi shakhmat ha ki Examination bapher bapher ha kine ki snem ban wan” ong u ma Shylla.
Ïa katei ka khusnam ha ryngkat ka syrnod bad ka song pisa kaba T.10 hajar tyngka la aiti da u Vice President ka MPA ma B.G. Ladia. ïa ki kyntien ai khublei la ïoh da ka Kongka Ranida Shylla kaba dei ka nonghikai.
