(M.M.Thaiang)
Uno uno ne kano kano ka ne u briew kiba shong kulai da u Khla, ki kwah ban pyni katno ki long kiba shlur bad ban pyntieng ia kiwei ba kin dem ha khmat jong ki, hynrei ka long pat kaba eh ban teh lakam ia u Khla bad ban pynphai kat shaba mon.
U Tuliram Ronghang, Chief Executive Member ka Karbi-Anglong Autonomous Council (KAAC) bad ki nongbud jong u ha ka jingwan jong ki sha Mukroh ki la wan da kaba shong kulai ha u Khla bad ban pyntieng ia ki Khasi-Pnar bad ia ki nong shong shnong jong ka Mukroh ba katno ki long kiba shlur bad ban pyntieng ia ki nong shong shnong jong ka Mukroh ba kin dem ha khmat jong ki, hynrei kim pyrkhat ba une u Khla uba ki shong kim lah ban teh Lakam bad pynphai ia u kat shaba ki mon.
Shuh shuh u Tuliram Ronghang (CEM -KAAC) u ong ba ki Pnar kiba shong basah ha Block I bad kum juh ia ki nong shong shnong jong ka Mukroh ba ki dei ki poi wir kiba shu wan shong ha kane ka thaiñ, hynrei u Tuliram Ronghang um tip pat ba ki Nong Jaintia (Khasi-Pnar) kiba shong basah ha Elaka Labang-Nongphyllut, Nongphyllut Dolloiship, Pangam Raliang, Elaka Dolloi Raliang bad ki Nongshong shnong jong ka Mukroh, Elaka Shilliangmyntang, ki tip ia ki Mikir kiba shu khot mynta kum ki Karbi, nangno ki wan, naduh mynno ki wan shong shnong hapoh ki pud ki sam jong kine ki Elaka bad naduh mynno ki ioh ia ka District Mikir (Karbi-Anglong ba mynta). U Tuliram Ronghang u la dei ban kylli shwa halade ba ha shwa ba ki Mikir (Karbi) kin wan shong ha kane ka thaiñ ia kaba ki briew ki kham iatip kum ka Block I, kane ka thaiñ (Block-I) ka dei ka jongno?.
Ia ka thaiñ kaba ki briew ki kham iatip kum ka “BLOCK-I” la pynlong da shi bynta u Dolloi Nongjngi, Dolloi Shiliang Myntang, Dolloi Raliang bad u Dolloi Labang-Nongphyllut bad kiba dei ki bynta jong ka Rilum Jaiñtia naduh hyndai hynthai. U Tuliram Ronghang bad ki lok Karbi kiba shong basah ha BLOCK-I, ha shwa ba yn kynthoh ba ki Khasi-ki Pnar bad ki nongshong shnong jong ka Mukroh ki dei ki briew kiba shu wan poiwir bad shong ha kane ka thaiñ, “Ko Tuliram Ronghang bad phi ki lok Karbi kiba shong basah ha Block-I, kylli shwa ialade nangno phi wan bad wan shong ha kine ki Elaka Dolloi jong ka Rilum Jaintia”.
U Tuliram Ronghang bad ka kynhun jong u, ki la wan jngoh ia ka shnong Mukroh da kaba shong kulai ha u Khla ban pyni katno ki long kiba shlur bad ban pyntieng ia ki Khasi- ki Pnar kiba don ha kane ka thaiñ ba kin dem hapoh jong ki. Ki Khasi- ki Pnar (Jaiñtia) naduh hyndai hynthai ki long ki briew kiba “KOMTI-NEI” ki don ki Nongsiat Khla, kiba la nud wat ban ialeh pyrshah ia ki bor jong ka Great Britain (England) ia kaba la tip kum ka Jaintia-Anglo War.
U Tuliram Ronghang, Chief Executive Member jong ka Karbi Anglong Autonomous Council, u la ai ding ha u ‘langiap bad kane ka ding ym lah tip shano kan pur? Lada kane ka ding kan pur u Tuliram Ronghang CEM, ka KAAC u hap ban kitkhlieh bad pynsniewdur ia ka jingiadei paralok hapdeng ki Karbi- bad ki Khasi-ki Pnar (Jaiñtia). U Tuliram Ronghang u la dei ban pan map shisyndon ia kane ka jingkynthoh jong u ba ki Pnar ki dei ki poiwir kiba shu wan shong ha Mukroh bad ha ka thain Block-I.