Ka kynthei kum ka nongpynkylla (She is a Changemake) ka dei ka prokram jong ka National Commission for Women jong ka Sorkar kmie bad kane ka dei ka wat kaba lai ba kane ka Commission ha ryngkat ka jingiatreilang bad ka State Institute of Rural Development (SIRD), Meghalaya kan pynlong ia kane ka prokram kyrpang na ka bynta ki kynthei jong ka Jylla Meghalaya.
Ka phang jong kane ka prokram ka long ban pynpaw ia ka jinglah jong ka kynthei ha ka ban ai ka jingnoh synniang na ka bynta ka jingkylla ha ka synshar ka khaddar, ka imlang ka sahlang bad ruh ha ka liang ka ioh ka kot jong ka Jylla. Ia kane ka prokram yn pynlong ha SIRD, Meghalaya Shillong naduh ka 5 tarik haduh ka 7 tarik mynta u bnai. Ki kynthei kiba la dep ban shah jied na Khasi Hills Autonomous District Council, Jaiñtia Hills Autonomous District Council bad na Garo Hills Autonomous District Council kin wan ban iashim bynta ha kane ka prokram.