Shi bynta na ka jingrekhe burom ia ka International Day of Person with Disabilities ne ki briew kiba don jingduna, ka ophis jong District Social Welfare Officer, East Khasi Hills District mynta ka sngi kala pynlong ia ka prokram halor ka phang “Transformative solutions for inclusive development: the role of innovation in fuelling an accessible and equitable world” ha shnong Mawkdok kaba hap hapoh ka Laitkroh Khatarshnong C&RD Block.
Ha kane ka sngi la wan ban iadon bynta da i kong N. Umdor, District Social Welfare Officer, East Khasi Hills District, bah W. Nongrum, Rangbah Shnong ka Mawkdok, ki nongtrei sorkar na ki tnat bapher bapher ha ryngkat ki briew kiba don jingduna kiba hap hapoh hapoh kane ka Block.
Haba ai jingkren ha kane ka sngi kakong Umdor kala ong ba ka jingthmu ban rakhe ia kane ka sngi ka long ban kyntiew ia ka hok bad ka bha ka miat jong ki para briew kiba don ha ki jingduna ha ki bynta bapher bapher jong ka imlang sahlang bad ha kajuh ka por ban wanrah ki lad ki lynti jingiarap ia ki.
I kong Umdor ila iathuh ba mynta u snem ka jingrakhe ka long ban nangpyniar shuh shuh ia ka jingiarap ia ki briew ba don jingduna kum ka jingiarap ha ka liang ka iohkam iohjam, ka jingialeh ban pynduna ia ka jingshahniew beiñ ne ka jingbym kheiñ iaryngkat kyrdan ia ki bad ruh ban kyntiew ia ki ha ka liang ka kam ialehkai sports.
Kiwei de kiba la ai jingkren ha kane ka sngiki kynthup ia u bah S. Kharjana, President ka Khasi Disability Association, Shillong uba la kren halor ka aiñ jong ka hok jong kiba don jingduna, ka kong D. Thangkiew kaba dei ka Legal Aid Counsel, DLSA, East Khasi Hills, ka kong O.Sumer kaba dei ka Health Educator na ka ophis DM&HO.
Kham hashwa ia kane kala don ka jingpynialehkai sport bad ka jingsumar ei ia kine ki briew ba don jingduna.