U Myntri Rangbah ka Jylla u Conrad K. Sangma ha ka 3 tarik mynta u bnai ula wan ban plie Block ba thymmai ha shnong Lumshnong ia kaba la tip kum ka Lumshnong C&RD Block ha East Jaintia Hills District.
Ha kane ka sngi plie ia kane ka Block la iadon ryngkat u Myntri ka Commerce and Industries u ma Sniawbhalang Dhar, u MLA ka thaiñ u ma Shitlang Pale, u MDC ka thain uba dei ruh u Chairman ka Joint Action Committee u ma E. Lamare, u DC ka East Jaiñtia Hills District u Abhilash Baranwal, IAS, u SP ka District u Jagpal Singh Dhanoa, IPS lem bad ki sahep sorkar na ki tnat bapher bapher bad ki nongialam shnong na ki shnong bapher bapher kiba hap hapoh kane ka Block ba thymmai.
Haba kren ha kane ka sngi u Myntri Rangbah ula ai khublei ia u Chairman bad ia baroh ki dkhot jong ka Joint Action Committee kila la trei shitom khlem shongthait ban ialeh ban pynioh ia kane ka Block ban urlong mynta ka sngi.
Ula ruh ba na ka daw jong ka jingbymdon ka Administrative Unit bad kiwei pat ki ophis sorkar kala pynlong ia kane ka thaiñ kaba sahdien ha ki kam pynroi pynpar. Ula ong ruh ba kane ka jingbymdon kine ki ophis sorkar kala pynlong ia ki nongshong shnong ban hap leit da ki bun bun kynta ban poi sha ki ophis Block naka bynta ban leit pan ia ki kam pynroi bad ia ki skhim sorkar bapher bapher. Kumta ula ong ba ka jingdon jong kane ka Lumshnong C&RD Block mynta kan pynjan ia ka jingtreikam jong ka sorkar sha ki paidbah kane ka thaiñ.
“Ngim kwah ba ki paidbah kin iaid da ki bun bun kynta, hynrei ngi kwah ba ka kynhun jong ngi bad ki sahep sorkar ryngkat ka tnat treikam sorkar kin wan shajan ia u paidbah” la ong shuh shuh u Conrad bad pynpaw ruh ba ka kamram jong ki nongmihkhmat bad ki sahep sorkar ka long ban shakri ia u paidbah.
Shuh shuh u Myntri Rangbah ula pyntip ba hapoh kine ki saw snem ka sorkar kala trei shithom khlem shongthait ban pynioh ia ka roi ka par ha baroh ki liang hapoh ka jylla, ban pynthikna ba ka jingtreikam jong ka sorkar ka dei ban poi shajan ki paidbah bad ban pynthikna ba ka sur jong u paidbah dei ban sngap bad ban ai ka jingshakri ia ki.
Ula ong ruh ba na ka daw jong ka jingwan lynshop jong ka khlam Covid-19, kala pynkiew ia ka jingpynlut jong ka sorkar palat ia ka 40 na ka shispah haba ia nujor bad ki samoi ba la dep. Hapoh kine ki saw snem ka sorkar kala trei shitom ban shna bun ki surok, kumjuh ruh la lah ban pynpoi umdih sha ki 3 lak tylli ki thliew ïing hapoh ka jylla.
Ha kaba iadei bad ka jingpyntreikam ia ka tika iada Covid-19 ka Jylla ka la lah ban kiew na ka kyrdan kaba 27 hapoh ka ri India sha ka ka kyrdan kaba 2. Ha ka jingiadei bad ka jingtreikam jong ka sorkar lyngba ki kor ki bor (internet) ne ka E-Governance ka Jylla Meghalaya hadien ka jingiakop bad ki ri kum ka China, Singapor bad ka United Kingdom kala long ka lahduh haboh ka pyrthei katkum ka jingithuh bala ai da ka United Nation, la ong shuh shuh u Myntri Rangbah.
Haba kren halor ka surok Sanopur shaduh Borghat kaba dei kawei na ki surokk ba kongsanbha ban pyniasoh ia ki nongshong shnong katei ka thaiñ u Myntri Rangbah ula ong ba ka sorkar kala dep ban mang Rs.120 klur tyngka na ka bynta ban shna noh ia ka surok ba jngai kumba 29.5 Kms ha kaba la dep ruh ban buh ia u Mawnongrim ia kane ka jingtrei.
Ha kane ka prokram u Myntri Rangbah ryngkat bad u ma Sniawbhalang Dhar kila sam ia Cheques hapoh ka Grassroot Level Response towars Ecosystem Enhancement and Nurturing Scheme (GREEN) / ka Payment For Ecosystem (PES) sha ki nongiohbynta kiba kynthup ia u ma Standing Lamare, ka Dorbar Shnong Sonapyrdi bad ka Presbyterian Church, Sonapur. La sam ruh ia ki Cheques sha ki 5 tylli ki VO kiba hap hapoh kane ka Lumshnong C&RD Block hapoh ka skhim NRLM CIF ha ka dor Rs.14 Lak tyngka. La sam ruh ia ki symbai sha ki 15 tylli ki IVCS hapoh ka East Jaiñtia Hills District, kaba mar Rs.1 Lak tyngka kawei.
Hadien kane ka jingialang u Myntri Rangbah ula leit plie paidbah bad jurip artad iaka ïing treikam ba thymmai jong kane ka Block ha shnong Lumshnong.
