Ka Ephphatha Society ka seng trei mon sngewbha kaba trei tang na ka bynta ki briew kiba kyrpang, ha ryngkat ka pyrthei baroh kawei kala rakhe ia ka sngi ba kyrpang jong ki briew ba duna ha ki dkhot met lane International Day for Person with Disabilities 2022, halor ka Theme: Transformative solutions for inclusive development, the role of innovation in fuelling an accessible and equitable world, ia kaba la pynlong hynnin ka sngi ha phyllaw ka office jong ka Ephphatha Society kaba don ha Moowakhu Dkhiah, East Jaiñtia Hills District.
La sakhi ia kane ka sngi da u ma Nehimaiah Tyngkan kum u Kongsan, u ma Postling Dkhar kum u Symbud Kongsan, i kong Ripaia Passah ba dei i District Social Welfare Officer, Khliehriat, kong Rinish Siangshai, Panel Lawyer, DLSA. Khliehriat, Father George Lyngkhoi bad kiwei kiwei kiba shah khot sngewbha sha kane ka prokram.
Haba sdang ka program i Rev. E.S Sapuh, President ka Ephphatha Society i la maitphang shaphang ka jingiaid lynti ka Society bad ia ki jingthmu ba dei ban leh ha ki sngi ki por ba dang wan. Haba ai jingkren ki Nongkren baroh kila ai jingïaroh ia ki dkhot ka Society ba kila ai jingshakri kaba kyrpang tang na ka bynta kiba duna ha ki dkhot met (Person with Disabilities) bad kila kitbok ia ka Society ba kan nangiaid shaphrang.
Ha kane ka sngi ka Society lyngba ka jingsynniang ki dkhot jong ka, kala iohlad ban sam ia ki Appreciation Certificate sha ki 3 ngut ki briew kiba duna dkhot met, ki Proficiency Award sha ki 3 ngut kiba duna dkhot met kiba la pass bha ia ka exam Matric ha ryngkat ka song Pisa; bad kala sam ruh ia ki 2 tylli ki Wheelchair sha kito ki bymlah ban iaid ban ieng ia kaba kila ioh jingiarap na ka State Resource Centre, Shillong bad u wei u White Cane sha u wei u bymlah ban ieng bha.
Kum ban pynkynmaw ka Ephphatha Society ka dei tang ma ka ka seng hapoh Jaiñtia Hills kaba trei kyrpang tang na ka bynta ki briew kiba duna ha ki dkhot met (Disability Affairs). Kane ka Society ka don ruh ia ka Inclusive Vocational Training Centre ha ka Course Tailoring bad Music, kyrpang na ka bynta kiba duna ha ki dkhot met, halor ka jingthmu ba kin ioh ia ka Skill lane ki jinghikai pyntbit khnang ba kin lah ban ieng ha ki kjat lajong. La pynwai ia ka prokram da ki ktien ai khublei na i TBn. S.Phawa Secretary Ephphatha Society.
