Ka Khooid ya ka Wah Myntdu (KYM) hapoh ka jingïalam u ma u Khroo L Pariat President ha ryngkat ka kong H. Dkhar Assistant GS, u ma A. Lamare Waheh Chnong Khimusniang, u Bimee Suwer GS Loompyrdi Iongpiah, u ma M. Bareh Waheh Chnong Dulong lem bad u ma R. Shallam SDO ka PHE (E) Sub-Division Jowai, hynnin ka sngi (5/12/2022) kila leit buddien biang ïa ka jaka pynkhuid umbam jong ka tnad PHE kaba don ha Urkhla.
Kane ka kynhun kala lap ba ka umbam kamba long mynta ka long kaba khuid hynrei na ka daw ki don ki jaka pyllang umbam (Top) kiba la rim palat kiba la don 30 snem tam, kumta don kapor ba ki jakhliah ki mih lyngba kine ki Top hi.
Halor kane ka KYM kala ai jingmut ïa u SDO ka tnad PHE ba kan shna pynthymmai biang ïa kitei ki jaka pyllang umbam kiba don ha manla ki dong ha sor Jowai, khamtam ïa kito ki dong bym pat don ïa ki tyllong umbam.
Haba jubab ïa kane u SDO ula pyntip ba ka ïing treikam jong u kan sa pynkhuid bad ñiat rong ïa baroh ki jaka pyllang umbam ka ban sdang naduh une u bnai ban wan, khnang ban phuh ban phieng ka shnong Jowai.
Ha ka juh ka por ka KYM ka kyntu jur ïa ki nongshong shnong ka sor Jowai ba kin ïaleh ban sumar khuid ïa ka Syiem Myntdu, bad la kyntu ruh ïa ka tnad PHE (Elect) ba kan dang lah ban pynpoi khambha ïa ka umbam kaba khuid ba suba sha ki paidbah nongshong shnong.
Katkum ka hukum jong u Deputy Commissioner barim ka WJH, la ïathuh ba ka tnat PHE (E) kan hap ban pynkhuid ha manla ka lai bnai ïa baroh ki jaka pyllang umbam jong ka, kumta na ka liang ka KYM ka kyrpad ïa u SDO ba un bud bad pyntreikam ïa kane ka hukum.
