U ma A.A Shullai haba ïakren bad ki lad pathai khubor mynta ka sngi ha nongbah Jowai ula khot ia ki paidbah nongthep vote jong ka jylla ba ki dei ban phai khmat sha kane ka party All India Trinamool Congress namar dei tang lyngba kane ka party ba yn sa lah ban wanrah ïa ka jingkylla ha ka synshar ka khadar hapoh ka Jylla bad ban pyllait na ka jingthombor ka sorkar MDA.
U ma Shullai ula pynbna ïa kane hadien ka jingialang ba lyngkot haba uwei na ki riew rangbah ha ka saiñ hima sima u ma Madonbai Rymbai uba dei ruh u CEM ba rim ka JHADC ula wan shakhmat ban ai jingkyrshan ba pura ïa u ha kane ka kynti kum u kyrtong MLA na ka 2-Jowai Constituency.
Na ka liang u ma Shullai ula pyntip ba ka jingmih jong u na ka Congress ban leit pyniasoh ïalade sha ka AITC ka long halor ka jingrailang jong ki nongïalam ka Congress ym da kaba ula shuh leh marwei hi.
Ula pyntip ruh ba ha ka 10 tarik u Nohprah ka sngi Saitjaiñ mynta u bnai ha ka por 10 baje mynstep kan don ka jingialang paidbah ban pynlong ha madan Jrisalein. Ha kane ka sngi yn pdiang ïa u kum u Candidate bad pynskhem ruh ïa ka Block Committee Jowai da ka jingwan synran lang ki nongïalam ba hakhmat ka AITC, ha ka juh ka por u khot lang ïa baroh ki paid nongkyrshan ban wan sakhi lang ha kane ka sngi.
U ma Madonbai Rymbai haba ai jingkren ula pyntip ba ka don kawei ka Political Party kaba dawa tiket MLA ïa u ban ïakhun MLA, hynrei lada um lah ban ïakhun ïa kane ula rai rangbah ban ai jingkyrshan ïa u ma Shullai kum u briew shimet.