Ka Jaintia Tribal Traders’ Association (JTTA) kaba don ia ka jaka treikam ha nongbah Jowai mynta ka sngi hapoh ka jingialam jong u President ma Iatha Najiar bad u Secretary ma A. Challam kila leit ban ia kynduh ia u EM ba dei peit ia ka Trading License (JHADC) ma W. Sungoh na ka bynta ban dawa na ka Council ba kam dei ban ai Trading License shuh sha ki bar jylla khamtam hapoh ka nongbah Jowai.
Kitei ki nongialam jong ka JTTA ha ka jingiakren bad u ma Sungoh kila pynkynmaw biang ha u ia ka jingkyrpad kaba ka seng kala ju buh na ka por sha ka por ban ym ai Trading License shuh ia ki Bar Jylla ne ki Company ban seng ia ki kam khaïi pateng ha ri lum Jaintia bad khamtam eh ha nongbah Jowai.
Na ka liang jong u ma Sungoh ula pynpaw ha khmat jong ka JTTA ba ma u ruh u shimkhia bha ia kane bad ula ju khot ruh ia ka jingiakynduh lang bad ki Waheh Shnong jong ka Jowai Urban na ka bynta ban iakren bad ia pylliew jingmut halor kane. Namar kane ka shong ruh ha ka bor jong ki Dorbar Shnong ula ong. Ula kular ruh ban wanrah shuh shuh ia kane ka mat jingiakren hapoh ka EC jong ka Council.
Ka JTTA ka pynpaw ia ka jingsngewnguh ia u ma Sungoh uba la kular ban shimkhia ia kane ka mat, namar ka long kaba ktah shi katdei eh ia ki nongkhaïi trai ri trai muluk kiba dang rit bor bad kiba tlot bor ban ia pyrshang bad kiwei pat ki jaitbynriew ne ki Company kiba wan nabar ban seng kam khaïi hapoh kane ka ri lum Jaintia ne ha Jowai.
Ha ka juh ka por ka seng ka khot lang ia ka jingiatrei lang naduh ki Sengbhalang, ki Synjuk ki Waheh Shnong kiba don ha Sor bad ha Nongkyndong ruh.
Kumban shu pynkynmaw ba dang shen ka JTTA kala ioh ban iaphylliew jingmut bad ka Synjuk ki Wahah Shnong ka Jowai Urban na ka bynta ban pynpaw ia ka jingeh kaba ki iakynduh.