Mynta ka sngi u Deputy Chief Minister ka sorkar jylla uba dei peit ïa ka tnad PWD (Roads) u bah Prestone Tynsong mynta ka sngi ula wan ban plie ïa ki hynniew tylli ki mawnongrim ki skhim pynroi bapher paber hapoh ka 2-Jowai Constituency ha ka jingïalang ba la pynlong ha madan Mihmyntdu West Jaiñtia Hills District.
Ha kane kane ka sngi la wan ban ïadonlang naduh u myntri jong ka tnad kam pynroi sor u ma Sniawbhalang Dhar, u MLA ka thaiñ u ma Wailadmiki Shylla, u CEM ka JHADC ma Thombor Shiwat, u Waheh Shnong ka Mihmyntdu u ma Abul Phawa nalor kiwei de kiba la shah khot sngewbha ha ryngkat ki paidbah nongshong shnong.
Na ka liang u bah B.W Phira Superintending Engineer PWD (R) Jowai Circle Jowai ula pynsngew ïa ka jingmang pisa na ka bynta kine ki skhim pynroi kiba kynthup ïa ka jingshna pynbha ïa ka surok hapoh ka sor Jowai lyngba ka jingiarap ka World Bank MITP ha ka jingjrong kaba 33.00 km kaba shongdor T.28 klur, ka Internal Roads ha Mihmyntdu ha ka jingjrong kaba 6.677 km hapoh ka RIDF-XXVII kaba kot T.5 klur, ka jingshna ïa ka jingkieng ba pynïasoh na KNB Road sha Thomas Jones College kaba T.80 lak, ka jingshna ïa u surok PWD ha Sabah Muswang ha ka jingjrong kaba 2.779 km kaba T.2 klur, ka jingshnapynbha ïa u suroh Demthring-Sohmynting-Moodymmai Road ha ka jingjrong kaba 22.30 km kaba kot T.45 klur, ka jingshna pynbha ïa u surok shnong (Internal Village Road) ha Niriang ha ka jingjrong kaba 2.08 km kaba kot T.1 klur tam, ka jingshan ïa u surok PWD na Madan Thadlaskeiñ sha Mission Aitnar haduh Mutong kynthup ka jingshna ïa ki kynroh bad ki nala um kaba kot T.2 klur tam. Haba kheiñ kyllum ïa baroh kine ki kam pynroi kila poi sha ka T. 84, 14,37,000/- tyngka.
Na ka liang u kongsan bah Prestone Tynsong ula ai ka jingïaroh ïa u MLA ka thaiñ da kaba ong ïa ki kyntien ngi ki briew “ngi peit tang nabar, hynrei kaba napoh dei ka jingïalam jong u Blei” kumta ka donkam ïaki khun samla ban ïohi ïa ka jingkylla dur jong ka Constituency hapoh ka jylla.
U buh ka jingkyntu ïa ki paidbah nongthep vote jong ka jylla ba ki dei ban pynshong nongrim bha haba ki jied ïa uno uno u briew uba lah ban ai ka jingshakri kaba bha tam ïa ka Constituency, namar kumba long mynta ki kam pynroi ba wanrah u MLA kiba poi sha ka 260 klur eiei bad ki dei ruh ban pyndep ïa ki ha ka snem 2024.
U bah Prestone ula ong ba hapoh ka jingïalam u Conrad K Sangma kila pyrshang ban wanrah ïa ki kam pynroi bapher bapaher hapoh ka jylla, khamtam ïa ka sor Jowai bad u kyrmen ba ka jingitynnad jong ka sor Jowai kan urlong ha kine ki kyndiat snem.
Ula kynthoh ïa u nongialam ka liang pyrshah u Mukul Sangma da kaba ong kat ki kam ba bha kiba kane ka sorkar ka la leh, hynrei u ïai pynpaw beit ïa ka jingpyrshah bad ka jinglait, kumta u kyntu ïa ki paidbah ba ki dei ban bishar ïa ka kam ym ïa ki social Media namar ha ka social media kiba bun hi tang ki kam kiba lait ban ïa kaba dei.
Ula ïathuh ba ha ka jingïaid lynti ki don shibun ki jingeh ba kane ka sorkar ka ïakynduh kiba kynthup naduh ka jingjia ha Ichamati, ka CAB, ka Them motor, ka thma Covid-19 bad kane ka sorkar kala ïakhun tyngeh ban pynbeit ïa kine kiba long ki jingkyrkhu ïa ki paidbah ka jylla hi baroh kawei.
U bah Prestone ula pyntip ha kaba ïadei bad ka Phase-1 jong ka jingpynbeit pud kila don shibun ki jingeh bad ki jingshah kynnoh ïa ki nongïalam naduh u Conrad Sangma bad ma u ruh kumjuh, hynrei na ka liang jong u, ula pynsngew “ba um tieng wat lada um don shñiuh hynrei u shñiuh jong u un ïeng, kine baroh dei tang ban leh ïa kaba dei ong u bah Prestone.
U kyrmen ba ïa kane ka Phase II jong ka jingpynbeit pud ka sorkar yn leh da ka jingïasngewthuh jingmut lang hapdeng ki ar jylla ha kaba yn don kyndiat khynsoit ka Plus bad ka Minus da ka jingïahun lang na baroh arliang.
Shuh shuh ula pynsngew ba ha ki sorkar kiba la dep ki don beit kita ki kyntien ‘Status Quo’ bad ynda ula pynkylla Khasi ka long “habneng ruh em ha khyndew ruh em”, bad ki briew kiba sah ha Border ki shem jingeh hynrei mynta kane ka sorkar kam kren shuh ïa kane ka Status Quo hynrei ka ïaid shakhmat ban pynbeit ïa u pud u sam.
